Vujoviq, Shala dhe Rexhepi u zgjodhën nënkryetarë; Haxhiu: Kuvendi është konstituuar

Në seancën konstituive të Kuvendit të Kosovës u zgjodhën nënkryetarët nga radhët e LDK-së, Listës Serbe dhe komuniteteve joshumicë joserbe – Kujtim Shala, Tanja Vujoviq dhe Emilija Rexhepi. Kryetarja e parlamentit, Albulena Haxhiu, konstatoi se Kuvendi i Kosovës është konstituuar, megjithëse nënkryetari nga radhët e PDK-së nuk është zgjedhur.

Në fillim të seancës, Haxhiu konstatoi se në sallë ishin të pranishëm 82 deputetë.

Ajo theksoi se deputetët e PDK-së as sot nuk janë të pranishëm në parlament, me çka, siç tha, po e shkelin aktgjykimin e Gjykatës Kushtetuese.

Kujtim Shala nga LDK-ja u zgjodh nënkryetar i Kuvendit

„Kuvendi i Kosovës nuk mund të jetë peng i asnjë partie politike, prandaj vazhdojmë me propozimin e LDK-së“, tha Haxhiu dhe u bëri thirrje deputetëve të votojnë për Shalën.

Ai mori 74 vota pro dhe u zgjodh nënkryetar i Kuvendit nga radhët e LDK-së.

Pas zgjedhjes së nënkryetarit nga radhët e LDK-së, pasoi propozimi i Listës Serbe.

Tanja Vujoviq nga Lista Serbe u zgjodh nënkryetare

Igor Simiq tha se propozimi i këtij grupi parlamentar ishte Slavko Simiq.

Kundër votuan 65 deputetë, kështu që ai nuk u zgjodh nënkryetar i Kuvendit të Kosovës.

Në raundin e dytë, Lista Serbe propozoi Igor Simiqin për nënkryetar të Kuvendit, por as ai nuk u zgjodh, pasi 62 deputetë votuan kundër.

Propozimi i tretë i Listës Serbe ishte Lilana Stevanoviq.

Nënkryetari nga Lista Serbe nuk u zgjodh as në raundin e tretë, pasi kundër propozimit votuan 62 deputetë.

Propozimi i katërt i Listës Serbe ishte Srgjan Popoviq, por as ai nuk mori numrin e mjaftueshëm të votave.

As propozimi i radhës i Listës Serbe që Branislav Nikoliq të zgjidhej nuk u miratua.

Propozimi i radhës i Listës Serbe ishte deputetja Jovana Radosavleviq, por me 63 vota kundër, ajo nuk u zgjodh.

Milan Joksimoviq ishte propozimi i shtatë i Listës Serbe. Megjithatë, kundër këtij propozimi votuan 63 deputetë.

Një tjetër propozim i Listës Serbe ishte kryetari i kësaj partie, Zlatan Elek. Kundër këtij propozimi votuan 63 deputetë.

Më pas u propozua Tanja Vujoviq, e cila me 62 vota u zgjodh nënkryetare e Kuvendit.

Emilija Rexhepi u votua për nënkryetare

Pas zgjedhjes së nënkryetares nga Lista Serbe, pasoi votimi për nënkryetarin nga radhët e komuniteteve joshumicë joserbe.

Emilija Rexhepi, me 70 vota pro, u zgjodh nënkryetare.

Haxhiu: Kuvendi i Kosovës është konstituuar

Pas zgjedhjes së nënkryetarëve nga radhët e LDK-së, Listës Serbe dhe komuniteteve joshumicë joserbe, Albulena Haxhiu theksoi se Kuvendi është konstituuar.

Kujtojmë se Lëvizja Vetëvendosje njoftoi mbrëmë se në seancën e sotme do të votojë për kandidatët e Partisë Demokratike të Kosovës dhe Lidhjes Demokratike të Kosovës, Vlora Çitaku dhe Kujtim Shala, për nënkryetarë të Kuvendit të Kosovës.

Megjithatë, para seancës së sotme, Partia Demokratike e Kosovës njoftoi se nuk do të marrë pjesë derisa të merret vendimi i Gjykatës Kushtetuese.