Zyra e BE-së: Shpresojmë në emërimin e Komisionerit për Gjuhët dhe krijimin e Njësisë për Përkthim në kuadër të Zyrës së Kryeministrit të Kosovës

Zyra e Bashkimit Evropian në Prishtinë njoftoi, me rastin e shënimit të Ditës Evropiane të Gjuhëve, se kjo është një mundësi për të vënë në pah rëndësinë e shumëgjuhësisë në mbarë kontinentin, e veçanërisht në Kosovë, si dhe se shpreson në emërimin e shpejtë të Komisionerit për Gjuhët dhe krijimin e Njësisë për Përkthim dhe Harmonizim në kuadër të Zyrës së Kryeministrit të Kosovës.

Nga Bashkimi Evropian theksojnë se, si një bashkësi me 24 gjuhë zyrtare, e ndihmojnë Kosovën që ta zbatojë plotësisht Ligjin për Përdorimin e Gjuhëve, ndër të tjera edhe përmes reformave që mbështeten financiarisht nga Plani i Rritjes për Ballkanin Perëndimor.

„Shpresojmë në emërimin e shpejtë të Komisionerit për Gjuhët dhe krijimin e Njësisë për Përkthim dhe Harmonizim në kuadër të Zyrës së Kryeministrit“, njoftuan nga Zyra e BE-së në Kosovë.

Bashkimi Evropian, si partneri më i fuqishëm i Kosovës, porosit se do të vazhdojë të ofrojë mbështetje për zbatimin e reformave në rrugën drejt integrimit në BE.

Megjithatë, ndonëse Ligji për Përdorimin e Gjuhëve në Kosovë përcakton se „gjuha shqipe dhe gjuha serbe dhe alfabetet e tyre janë gjuhë zyrtare në Kosovë“ dhe se kanë status të barabartë në institucione, praktika ka treguar se këto dispozita nuk respektohen.

Gazetarët e redaksive serbe në Kosovë shpesh vënë në dukje se barazia e gjuhës serbe shkelet prej dekadash në mënyra të shumta, se atyre u mohohet përkthimi në institucione dhe u pamundësohet përdorimi i gjuhës amtare në komunikimin zyrtar.

Shoqata e Gazetarëve të Serbisë, së bashku me degën e saj në Kosovë, në mars të këtij viti shprehu protestë për shkak se tri agjenci të Kombeve të Bashkuara në Kosovë kishin vendosur që mediave në gjuhën serbe t’u dërgonin njoftime dhe informacione ekskluzivisht në gjuhën shqipe.

Gjuha serbe, përkatësisht alfabeti cirilik, u bë pengesë edhe në tabelat orientuese dhe tabelat me emrat e vendeve dhe institucioneve, ndaj autoritetet e Kosovës i zëvendësuan ato me mbishkrime në alfabetin latin.