Babai i të riut nga Vuça: Policia e teproi me përdorimin e forcës

Vlladan Millojeviq, babai i njërit prej të rinjve që dje u legjitimua nga Policia e Kosovës në fshatin Vuçë pranë Leposaviqit, e më pas u qëllua me armë zjarri pasi shoku i tij filloi të ikte, mendon se policët kosovarë kanë reaguar në mënyrë të tepruar.

Sipas tij, djali i tij, Gjorgje, dhe shoku i tij, Mlladen Milladinoviq, dje po bënin piknik me skarë bashkë me shoqërinë në fshatin Gërkajë dhe, kur shkuan të merrnin një karikues, u ndaluan nga Policia e Kosovës e shoqëruar nga automjetet e KFOR-it.

Pas legjitimimit dhe kontrollit, policia kërkoi telefonat e të rinjve. Gjorgje ia dorëzoi menjëherë telefonin, ndërsa Mlladeni refuzoi dhe filloi të tërhiqej, e më pas vrapoi drejt pyllit.

Millojeviq tregon se në atë moment djali i tij dëgjoi një të shtënë, por nuk e di nëse është qëlluar drejt Mlladenit apo në ajër.

“Djali im Gjorgje, së bashku me shoqërinë e tij, dje rreth orës 12 shkoi në fshatin Gërkajë për të pjekur mish. Shoqëria e tij përbëhej nga fëmijë 16, 17 deri në 20 vjeç. Ishin rreth dhjetë vetë. Morën gjithçka që u duhej për piknik dhe në një moment e kuptuan se kishin harruar një karikues. Ai dhe shoku i tij, Mlladen Milladinoviq, u nisën drejt fshatit tonë për ta marrë dhe, diku në gjysmë të rrugës nga vendi ku po pjeknin mish deri në fshat, hasën një automjet të Policisë së Kosovës, një ‘Toyota’ ngjyrë gri, e shoqëruar nga dy automjete të KFOR-it amerikan. Menjëherë ndaluan në shenjën e policisë. Policia e Kosovës i legjitimoi. Djali im nuk kishte me vete letërnjoftimin. Mlladen Milladinoviq e kishte dhe ia dha menjëherë. Pas kësaj, ata kontrolluan automjetin dhe panë se nuk kishte asgjë brenda, por më pas kërkuan telefonat e tyre. Djali im ia dha menjëherë telefonin e tij, ndërsa Mlladeni, për një arsye, nuk deshi. Mendoj se nuk deshi, sepse Policia e Kosovës ka zakon t’i marrë telefonat në këtë mënyrë, t’i dërgojë për ekspertizë dhe kurrë të mos t’i kthejë,” rrëfen Millojeviq.

Gjatë bindjes së Mlladenit që edhe ai të dorëzonte telefonin, sipas fjalëve të Millojeviqit, Mlladeni fillimisht filloi të ecte ngadalë drejt skajit të rrugës dhe në një moment nisi të ikte.

“Policët i dhanë urdhër djalit tim të ulej në tokë dhe të qëndronte i qetë, gjë që ai e respektoi, ndërsa tre prej tyre shkuan në ndjekje të Mlladenit. Në atë moment djali im dëgjoi një të shtënë. Meqenëse ishte në pozicion ulur, nuk është i sigurt dhe nuk mundi të shihte nëse u qëllua drejtpërdrejt drejt tij apo ndoshta vetëm si shenjë paralajmëruese, por definitivisht pati të shtëna. Kur u kthyen nga ndjekja pas disa minutash, i vunë prangat pas shpine djalit tim dhe gjatë këtij procesi pati sharje në gjuhën shqipe. Djali im, i cili nuk e di gjuhën shqipe, thotë se dëgjoi sharje, por nuk është i sigurt nëse ato iu drejtuan atij apo Mlladenit, i cili arriti t’u shpëtonte,” tha Millojeviq.

Policia e dërgoi Gjorgjen me pranga në stacionin e policisë në Leposaviq, ku, siç shton Millojeviqi, dha deklaratë për policinë lokale dhe për njësinë hetimore nga Prishtina.

“E futën në makinë (Gjorgjen) dhe zbritën me të deri te lumi Ibër, te ura në fshatin tonë, ku unë mora informacionin se ndodheshin aty. Ndeza makinën dhe shkova të shoh çfarë po ndodhte. Policët e mbanin djalin tim të lidhur në një mjet të blinduar, por ishin korrektë me mua dhe më lejuan ta shihja. Pashë që ishte mirë, se nuk kishte lëndime të dukshme dhe se nuk ishte rrahur. Ishte me humor të mirë. Në atë moment ata më kërkuan të shkoja në shtëpi e të sillja letërnjoftimin e tij, gjë që e bëra, megjithatë ata e shoqëruan djalin tim në Stacionin Policor në Leposaviq, ku ai duhej të jepte deklaratë. Qëndroi gjatë në Stacionin e Policisë, sepse kur përdoret armë zjarri duhet të vijë njësia hetimore nga Prishtina, kështu që dha dy deklarata, një për policinë lokale dhe një për njësinë hetimore,” tregoi babai i Gjorgjes.

Djali i tij qëndroi në polici tre-katër orë, por, sipas tij, nuk ishte maltretuar dhe as rrahur.

Ai thotë se diku ka lexuar se zëvendëskomandanti i policisë, Veton Elshani, ka dhënë deklaratë se të rinjtë kishin ikur dhe se kishte pasur ndjekje, por se kjo nuk është e vërtetë.

“Ajo rrugë në fshatin Gërkajë është shumë e ngushtë dhe ata sapo dolën në patrullë u ndalën menjëherë, kështu që nuk ka pasur asnjë mundësi të përpiqeshin të iknin, as nuk kishin qëllim të bënin një gjë të tillë, prandaj kjo informatë nuk është aspak e saktë. Djali im nga natyra është i qetë dhe i disiplinuar, kështu që i respektoi të gjitha urdhrat e Policisë së Kosovës dhe ata nuk e kanë maltretuar, as rrahur dhe asgjë tjetër,” tha Millojeviq.

Siç supozon ai, Mlladeni ka shumë të ngjarë të ikte nga frika dhe duke dashur të shpëtonte telefonin e tij, dhe ndoshta edhe nga një valë adrenaline.

"Kur qëlluan, ai fitoi edhe më shumë dëshirë për jetë, për liri dhe filloi të ikte. Megjithatë, me nxitjen e familjes dhe miqve të tij, ai u paraqit në Stacionin e Policisë në Leposaviq mbrëmë, dha një deklaratë dhe këtë mëngjes e thirra babanë e tij, i cili konfirmoi se ai ishte liruar, se aktualisht është në shtëpi", shtoi Millojeviq.

Ai shton se, sipas dijenisë së tij, fëmijët nuk janë maltretuar fizikisht.

“Nuk kanë rrahur askënd, kjo është gjithashtu një nga gënjeshtrat, nuk i kanë maltretuar, përveç asaj reagimi të tyre të tepruar. Ajo që vura re dhe që është shumë interesante është se kishte një numër të madh automjetesh policore dhe një numër të madh policësh, sikur të po arrestonin ndonjë kriminel të rrezikshëm, e jo disa të rinj 17–18 vjeçarë,” theksoi Millojeviq.

Ai thotë se frikë te fëmijët sigurisht ka pasur dhe se, si prindër, po bëjnë gjithçka për ta tejkaluar këtë së bashku.

“Kujt do t’i ishte njësoj pas një ngjarjeje të tillë? Çfarëdo që të kenë bërë fëmijët, nuk është arsye të qëllohet mbi ta. Kjo është një përdorim jashtëzakonisht i madh force për diçka pothuajse të parëndësishme. Por, çfarë të bëjmë, ne jemi pranë tyre dhe po përpiqemi t’i qetësojmë dhe t’i nxjerrim në rrugën e drejtë,” tha Millojeviq.