Në maternitetin e Pasjanit gjatë vitit 2025 kanë lindur 136 bebe, për një dekadë 1.337 fëmiije të porsalindur

Në maternitetin e Pasjanit gjatë vitit 2025 kanë lindur 136 bebe, që është më shumë krahasuar me vitin 2024. Gjatë dhjetë viteve të fundit kanë lindur gjithsej 1.337 bebe.

Mjekja e maternitetit, Marina Jovanoviq, ka deklaruar për Kosovo online se e gëzon fakti që gjatë vitit 2025 kanë lindur më shumë bebe dhe se materniteti në Pasjan përfaqëson një shtyllë të mbijetesës së serbëve në Anamoravën e Kosovës.

“Gjatë vitit 2024 në maternitetin tonë kanë lindur 134 bebe, ndërsa në vitin 2025, deri më 30 dhjetor, kanë lindur 136 bebe, që është një numër më i madh krahasuar me vitin e kaluar. Gjatë dhjetë viteve të fundit në maternitetin tonë kanë lindur gjithsej 1.337 bebe, çka e konsideroj një numër të madh në raport me numrin e banorëve që jetojnë në Anamoravën e Kosovës. Mendoj se ky spital dhe ky maternitet përfaqësojnë një shtyllë të mbijetesës së serbëve në Anamoravën e Kosovës”, ka thënë Jovanoviq.

Ajo theksoi se në maternitet punon një ekip profesional mjekësh që kujdeset për çdo lehonë dhe çdo bebe.

“Këtu lindin gra jo vetëm nga Anamorava e Kosovës, por edhe nga Shtërpca, Kosova qendrore dhe jugu i Serbisë. Kjo është para së gjithash sepse kushtet janë të mira; punon një ekip i ri mjekësh. Jemi katër gjinekologë që punojmë këtu në spitalin e Pasjanit dhe kemi edhe tre mjekë të tjerë që na ndihmojnë dhe nga të cilët mësojmë shumë”, ka thënë Jovanoviq.

Një nga mjekët që menjëherë pas hapjes vendosi të ofrojë ndihmë për maternitetin e Pasjanit, përmes punës dhe trajnimit të kolegëve të rinj, është doktori Sllavko Krstiq, i cili për merita të veçanta është edhe fitues i Urdhrit të Sretenjës të shkallës së tretë. Krstiq tha se, pavarësisht se ka hyrë në dekadën e tetë të jetës, ende ka dëshirë për të punuar.

“Në fillim më ishte pak e çuditshme, sepse ishte një mjedis i ri për mua. Në Leskovc kam punuar plot dyzet vjet. Kur njeriu fle një natë në Kosovë, Kosova është një vend i çuditshëm, diçka e tërheq njeriun dhe ai vazhdon të punojë. Kështu vazhdova edhe unë të punoj, me dëshirën për të trajnuar kolegët, të cilët janë njerëz shumë të mirë, ashtu si edhe stafi, mamitë, infermieret, instrumentistet dhe mendoj se askund nuk ka staf si këtu. Veçanërisht më gëzon fakti që materniteti ndodhet në një mjedis rural, gjë që nuk ekziston askund në botë. Herë pas here vendos të ndërpres punën, por pastaj fillova t’i trajnoj në ndërhyrje kirurgjikale, në procedura operative nga fusha e gjinekologjisë, sepse më parë, përveç prerjes cezariane, nuk bënin asgjë tjetër, dhe tani kanë përparuar në aspektin profesional. Nuk e di si t’i lë, familja ndërhyn që të mos punoj më, kam shumë vite, por ende mund ta kryej mjaft mirë këtë punë”, ka thënë Krstiq.