Qytetarët e Prishtinës: Politikanët po humbasin kohë, ndërsa populli po vuan nga mungesa e institucioneve

Qytetarët e Prishtinës nuk e shohin me dashamirësi krizën institucionale që po vazhdon prej katër muajsh në Kosovë. Në një bisedë me gazetarët e Kosovo online, ata thonë se në një situatë të tillë, njerëzit e zakonshëm vuajnë më shumë.

Sellim Vala paralajmëron se pamundësia e partive kryesore për të gjetur një marrëveshje prodhon një situatë politike që nuk i përshtatet askujt.

„Kjo nuk i konvenon askujt, nuk e di çfarë po bëjnë. Njerëzit këtu po vuajnë, ata duan të kenë qeveri, parlament. Politikanët, të gjitha partitë, vetëm po humbasin kohë”, thekson Vala.

Nga ana tjetër, Shub Bajrami pret që institucionet të formohen së shpejti, sepse populli është ai që e paguan çmimin.

„Nuk e di çfarë të them, ndoshta populli. Është shumë e vështirë, ende nuk ka institucione, por shpresoj se së shpejti do të ketë”, thotë Bajrami.

Një nga shqiptarët që punon në Gjermani dhe shpesh është në Prishtinë, i zhgënjyer, konstaton se është e qartë kush e paguan çmimin.

„Populli, kush tjetër“, tha ai.

Edhe bashkëbisedues të tjerë janë të bindur se të gjithë po vuajnë për shkak të mosformimit të institucioneve.

„Po vuajnë të gjithë. Qytetarët më së shumti, kjo dihet”, komentoi shkurt një kalimtar.

Shumica e bashkëbiseduesve nuk e drejtojnë gishtin kah „fajtori“.

„Dikush është fajtor, por nuk e di kush. Ne po vuajmë”, tha shkurt Erol.

Të tjerë janë të bindur se dikush do të duhet edhe „të paguajë“ për këtë situatë.

„Dikush do të paguajë. Ka shumë para, por njeriu i varfër nuk merr asgjë”, tha një tjetër bashkëbisedues i Kosovo online.

Për njërin nga bashkëbiseduesit që u prezantua si Osmani, populli është fajtor për situatën aktuale sepse ai zgjodhi deputetët dhe qeverinë.

"Populli. Populli sepse ai zgjodhi një qeveri që nuk është për shtetin. Qeveria që akuzon gjeneratën më të mirë të UÇK-së nuk është qeveri. Askund në botë nuk mund të ndëshkohet UÇK-ja, nga asnjë vend. Por populli nuk di si ta zgjedhë qeverinë", është i bindur Osmani.