Turkoviq: Radiqi është i frikësuar dhe i shqetësuar, ka hematomë në kokë

Kirurgu kujdestar në QKS Mitrovicë, Bllazho Turkoviq, ka thënë për Kosovo online se në atë institucion është pranuar sot i rrahuri Dejan Radiq nga Gracka e Vjetër afër Lipjanit dhe se i është bërë CT për shkak të hematomës në kokë, dhe se ishte shumë i tronditur dhe i frikësuar.

“Ai është transferuar në procedura të mëtutjeshme diagnostikuese nga mjekët e QKS Prishtinës. Është kryer një skanim CT e kokës për shkak të lëndimeve nga kontuzion i kokës, hematoma, ënjtje të buzëve, hundës dhe ballit. Është kryer një skanim CT. Është kërkuar që pacienti të mbahet tek ne për monitorim të mëtutjeshëm, gjë që ai ka refuzuar shprehimisht për shkak të problemeve familjare”, tha Turkoviq.

Turkoviq deklaroi se Radiqi insistoi që ai të kthehej në Graçanicë, dhe se gjetjet e CT do të ishin në dispozicion dhe do të lexoheshin më vonë, për të parë nëse kishte lëndime më serioze, përveç atyre që mjekët regjistruan dhe shënuan.

“Ai ishte shumë i tronditur, mendërisht pak i frikësuar. Më shumë se zakonisht për një të rritur. Bëhet fjalë për ënjtje të ballit, fytyrës dhe buzëve. Kjo është tipike për lëndimet e kokës me kontuzion. Me shumë mundësi janë marrë në një përleshje, siç tha ai, se është sulmuar dhe rrahur”, thotë Turkoviq.

Zyra për Kosovë dhe Metohi ka bërë të ditur se rreth mesnatës së mbrëmshme është rrahur dhe grabitur Dejan Radiq nga Gracka e Vjetër i komunës së Lipjanit. Zyra e cilëson këtë sulm si të motivuar etnikisht dhe paralajmëron se ka shkaktuar shqetësim dhe frikë të madhe te serbët e mbetur në këtë vend.

“Tre sulmuesit që flisnin shqip fillimisht e lidhën, më pas e rrahën me shkop dhe në fund e grabitën”. I sulmuari është ndihmuar nga fqinjët serbë të cilët kanë lajmëruar policinë, pasi Dejani jeton i vetëm në shtëpinë e familjes, duke qenë se nëna e tij ka ndërruar jetë para pak kohësh”, thuhet në deklaratë.