Gjykata Supreme e Kosovës hodhi poshtë ankesat e Listës Serbe, Emilija Rexhepit dhe dy kandidatëve të PDK-së

Gjykata Supreme e Kosovës i hodhi poshtë si të pabazuara të pesë ankesat e paraqitura kundër vendimeve të Panelit Zgjedhor për Ankesa dhe Parashtresa (PZAP) lidhur me rezultatet përfundimtare të zgjedhjeve të jashtëzakonshme parlamentare. Ndër to ishte edhe ankesa e Listës Serbe, e cila pretendonte se partia Për Liri, Drejtësi dhe Mbijetesë e kishte fituar mandatin e garantuar për komunitetin serb kryesisht falë votave nga qendrat e votimit në mjedise me shumicë shqiptare.

Lista Serbe në ankesë pretendonte se me këtë cenohet qëllimi kushtetues i përfaqësimit autentik të komunitetit serb.

Gjykata Supreme, siç thuhet në njoftim, vlerësoi se këto pretendime janë të pabazuara.

“Sipas Kushtetutës së Republikës së Kosovës dhe Ligjit për Zgjedhjet e Përgjithshme, votimi është personal, i barabartë, i lirë dhe i fshehtë, ndërsa lista e votuesve nuk përmban të dhëna për përkatësinë etnike të votuesve. Për rrjedhojë, nuk ekziston bazë ligjore që vlefshmëria ose efekti juridik i votës të varet nga përkatësia etnike e votuesit apo nga struktura demografike e vendit ku është dhënë vota”, thuhet në arsyetimin e aktgjykimit.

Gjykata shtoi se Lista Serbe nuk ka paraqitur prova konkrete që do të vërtetonin manipulim të votave apo parregullsi të tjera zgjedhore që mund të ndikonin në rezultatin përfundimtar.

“Pretendimet bazohen në supozime dhe krahasime statistikore, të cilat nuk përbëjnë bazë juridike për ndërhyrje në rezultatin zgjedhor”, thuhet në vendim.

Gjykata vlerësoi gjithashtu se subjekti politik që ka fituar mandatin e kontestuar është një subjekt i regjistruar për përfaqësimin e komunitetit serb, prandaj nuk mund të konsiderohet se është shkelur mekanizmi kushtetues i vendeve të garantuara.

Gjykata Supreme hodhi poshtë edhe ankesën e kandidates së Partisë së Re Demokratike, Emilija Rexhepi, e cila kërkonte verifikimin e ligjshmërisë së votave që subjekti politik Për Liri, Drejtësi dhe Mbijetesë kishte marrë në gjashtë qendra votimi në komunën e Prizrenit. Ajo pretendonte se këto vota ishin dhënë në vendbanime me shumicë të komunitetit boshnjak dhe se kjo duhej të verifikohej për të mbrojtur mandatet e garantuara për komunitetin serb.

Gjykata Supreme vlerësoi se vendimi i PZAP-it është i drejtë dhe i bazuar në ligj, pasi legjislacioni zgjedhor nuk e lidh vlefshmërinë e votës me përkatësinë etnike të votuesit dhe nuk ekziston bazë kushtetuese apo ligjore për vlerësimin e votave në bazë të strukturës etnike të vendbanimit.

U refuzua edhe ankesa tjetër e Rexhepit, në të cilën ajo pretendonte se ekziston mospërputhje ndërmjet strukturës demografike të vendbanimeve dhe rezultateve zgjedhore, duke kërkuar anulimin e atyre votave me qëllim të rishpërndarjes së mandatit të garantuar për komunitetin boshnjak.

Gjykata hodhi poshtë edhe ankesat e kandidatëve të Partisë Demokratike të Kosovës (PDK), Bekim Haxhiu dhe Qëndrim Kryeziu, të cilët kërkonin rinumërim të plotë të votave preferenciale të kandidatëve të PDK-së.

Gjykata vlerësoi se ankuesit nuk kanë paraqitur prova të mjaftueshme që do të arsyetonin një rinumërim të plotë.

“Vendimet e PZAP-it janë marrë në përputhje me Kushtetutën dhe Ligjin për Zgjedhjet e Përgjithshme të Republikës së Kosovës, ndërsa pretendimet në ankesa nuk janë mbështetur me prova bindëse që do të justifikonin ndërhyrjen në rezultatet përfundimtare të zgjedhjeve”, përfundoi Gjykata Supreme.