Muhaxhiri: Pres që KQZ-ja ta përfundojë sa më shpejt numërimin, ndërsa institucionet përgjegjëse të ndëshkojnë fajtorët

Analisti politik Artan Muhaxhiri, duke komentuar për Kosovo online rinumërimin e të gjitha votave nga zgjedhjet e mbajtura, tha se nga Komisioni Qendror i Zgjedhjeve pret që procesi i numërimit të përfundojë sa më shpejt, ndërsa nga institucionet kompetente të ndëshkojnë përgjegjësit për manipulimet.

Muhaxhiri thekson se procesi zgjedhor, i cili më herët ka funksionuar mirë, tani është stigmatizuar.

“Përqindja e votave të kontestuara është shumë e lartë dhe mendoj se KQZ-ja dhe organet gjyqësore do të japin maksimumin e tyre për ta pastruar procesin, për t’ia rikthyer imazhin dhe për t’i ndëshkuar përgjegjësit. Problemi më i madh është se deri më tani personat që kanë kryer këto manipulime nuk janë ndëshkuar ose janë ndëshkuar me dënime shumë të vogla. Kjo sepse kjo është trajtuar si procedurë normale, por në një shkallë shumë më të vogël. Tani kjo është në një nivel shumë më të lartë dhe duhet të zgjidhet më shpejt, sepse do të ndikojë në legjitimitetin e gjithë procesit zgjedhor”, tha ai.

Muhaxhiri pret që numërimi i votave të përfundojë deri më 5 mars, përkatësisht në kohë për zgjedhjet presidenciale.

“Mendoj se KQZ-ja ka përgjegjësi të madhe, por edhe presion që ta përfundojë sa më shpejt numërimin. Ata kanë staf, kanë ekipe. Duhet ta përfundojnë para 5 marsit, sepse do të ishte një katastrofë e madhe politike që Kosova të mos ketë parlament, president dhe qeveri. Madje Kushtetuta nuk parashikon as skenar për një situatë të tillë. Mendoj se kjo do të ishte shkatërruese për sistemin politik të Kosovës. Besoj se politikanët kosovarë kanë mjaftueshëm maturi që të mos e vendosin Kosovën në një pozitë të vështirë”, përfundoi Muhaxhiri.