Alija: Nuk do të ketë shtyrje të aktgjykimit në rastin kundër Thaçit dhe të tjerëve

Juristi Amer Alija nga Fondi për të Drejtën Humanitare vlerëson se nuk do të ketë shtyrje të aktgjykimit në rastin kundër Thaçit dhe të tjerëve dhe se Dhomat e Specializuara të Kosovës do ta respektojnë afatin e caktuar për aktgjykimin e shkallës së parë.

“Nëse flasim për rastin kundër Thaçit dhe të tjerëve që akuzohen për krime lufte, siç e dimë, shqyrtimi kryesor tashmë ka përfunduar dhe nuk ka më prova të reja. Megjithatë, pamë që muajin e kaluar mbrojtja u ankua se gjykata ka publikuar disa prova të reja”, thotë Alija dhe vazhdon.

“Por nuk bëhet fjalë për prova të reja, por për prova që tashmë janë në sistem. Siç e dimë, gjykata për këtë çështje ka marrë vendim dhe ka sqaruar se nuk bëhet fjalë për prova të reja, por se gjykata tashmë është duke punuar në analizimin dhe hartimin e aktgjykimit të shkallës së parë.”

Alija vlerëson se aktgjykimi nuk do të shtyhet.

“Kjo nuk mund ta shtyjë aktgjykimin, sepse nuk janë prova të reja. Afati për shpalljen e aktgjykimit të shkallës së parë është i paraparë me rregulloren që përdor gjykata. Brenda 90 ditësh gjykata duhet ta shpallë aktgjykimin e shkallës së parë, por mund të kërkojë një afat shtesë prej 60 ditësh nëse vlerëson se rasti është i ndërlikuar dhe se trupit gjykues i nevojitet më shumë kohë për të analizuar të gjitha provat. Në atë rast, afati mund të zgjatet në gjithsej 150 ditë, brenda të cilave pritet të shpallet aktgjykimi i shkallës së parë”, thotë bashkëbiseduesi ynë.