Avokati Nikoliq: Jevtiq do të mbahet në paraburgim për 30 ditë

Oficeri i policisë së Kosovës, Bojan Jevtiq nga Berivojci, pranë Kamenicës së Kosovës, i cili akuzohet nga Prokuroria Speciale për spiunazh, u urdhërua nga Gjykata Themelore në Prishtinë që të mbahet në paraburgim për 30 ditë, konfirmoi avokati i tij Milosh Nikoliq.

"Jevtiq u la në paraburgim për 30 ditë", deklaroi shkurt avokati Nikoliq.

Nikoliq tha sot pas seancës dëgjimore për paraburgim se kundër Jevtiq po zhvillohet një hetim për veprën penale të spiunazhit dhe se mbrojtja ofroi lirim me kusht për masën e arrestit shtëpiak.

“Bojan Jevtiq është pjesëtar i policisë së Kosovës, ai ka qenë në shërbim që nga viti 2002. Një hetim po zhvillohet kundër tij për veprën penale të spiunazhit. Gjëja e rëndësishme është se sot paraqitëm argumente në favor të tij, sa i përket kërkesës për paraburgim, se ai do të jetë në dispozicion të autoriteteve deri në përfundim të procedurës, se do t'i përgjigjet thirrjes, dhe për këtë qëllim kemi ofruar një masë lirimi me kusht, në shumën prej 15,000 eurosh”, tha sot Nikoliq.

Jevtiq u arrestua dje në pikën kufitare Dheu I Bardhë.

Ministri i Punëve të Brendshme me mandat teknik Xhelal Sveçla njoftoi dje se Jevtiq u arrestua me dyshimin për spiunazh në emër të strukturave të sigurisë së Serbisë.

“Ky është personi i gjashtë i arrestuar në lidhje me rastet e spiunazhit në Kosovë. Një nga të dyshuarit tashmë e ka pranuar fajësinë, gjë që konfirmon punën serioze dhe profesionale të institucioneve të Kosovës, por edhe përfshirjen e Serbisë në përpjekjet për destabilizim kundër Republikës së Kosovës”, shkroi Sveçla në Facebook.