Shtëpia e Gjoriqëve në Lipjan u sulmua me gurë: Nuk është hera e parë, jemi nën presion të madh, ndërsa policia nuk reagon

Shtëpia e familjes Gjoriq në Lipjan u sulmua me gurë mbrëmë rreth orës 21:00, duke thyer xhamin e një dritareje. Siç theksoi Lilana Gjoriq, nuk është hera e parë që shtëpia e tyre është shënjestër e vandalëve, dhe sipas saj, mesazhi është i qartë.

“Mendova se ishte një kapsollë, mbrëmë kishte edhe fishekzjarre për shkak të zgjedhjeve, televizori ishte i ndezur dhe nuk i kushtova vëmendje. Edhe më parë ka ndodhur që të hedhin kapsolla, të gjuajnë me gurë. Bashkëshorti e ka raportuar në polici dhe ata kanë ardhur, por asgjë, thonë se janë fëmijë të vegjël, nuk mund t'u bëjmë gjë. Kjo ndodh prej vitesh, që nga viti 2000. A po na bëhet presion sepse jemi serbë dhe duan të na detyrojnë të shesim shtëpinë...?”, theksoi Gjoriq.

Ajo shtoi se mbi serbët e mbetur në Lipjan ushtrohet presion i madh.

“Ka shumë sulme ndaj nesh, nga 10.000 serbë sa kishte dikur në Lipjan, kanë mbetur vetëm 300. Unë punoj në shkollë, dhe numri i nxënësve është shumë i vogël. Të gjithë jemi nën presion, jo vetëm familja jonë, por edhe të gjithë ata që kanë mbetur këtu,” tha ajo.

Policia e Kosovës edhe kësaj radhe kreu hetimet, megjithatë, familja Gjoriq nuk pret që rasti i tyre të marrë ndonjë epilog.

“Erdhi Policia e Kosovës, bënë fotografi, bashkëshorti dha deklaratë, kemi dhjetë procesverbale vetëm në dy muajt e fundit, që nga janari. Kur ishte festa e Shën Joanit, na gjuajtën nga ana tjetër. Ata nuk reagojnë, a nuk reagojnë sepse jemi serbë? Unë besoj se po, nuk duan të na mbrojnë. Pas kaq shumë denoncimeve, ata nuk bëjnë asgjë,” thotë Gjoriq.

Ajo thekson se nuk ndihen të sigurt në shtëpinë e tyre.

“Nuk jemi aspak të sigurt, ata mund të na vrasin. Ne jemi shënjestër e tyre, nuk e di pse, ne nuk i ngacmojmë dhe nuk i fyejmë askënd,” shtoi ajo.