Berisha: Çështja e shqiptarëve në Preshevë, Bujanoc dhe Medvegjë po keqpërdoret, nuk do të lejojmë ndikimet politike të Kurtit

Ministri për të Drejtat e Njeriut, të Drejtat e Pakicave dhe Dialogun Shoqëror në Qeverinë e Serbisë, Demo Berisha, duke folur për vizitën e fundit të kongresmenëve amerikanë, vlerësoi se po rihapet sërish çështja e të drejtave të shqiptarëve në Preshevë, Bujanoc dhe Medvegjë, por edhe po tentohet që kjo çështje të lidhet me të drejtat e serbëve në Kosovë.

“Ky proces në këtë moment është i lidhur me zhvillimet dhe ngjarjet që janë në rrjedhë, si dhe me lëvizjet e ardhshme politike. Para së gjithash, bëhet fjalë për ndikimin e diasporës shqiptare që jeton në Shtetet e Bashkuara të Amerikës, gjë që patëm mundësi ta dëgjonim nga zoti Keith Self dhe bashkëpunëtorët e tij gjatë bisedimeve në Qeverinë e Republikës së Serbisë. Qëllimi i iniciativave të tilla është krijimi i një hendeku dhe ndërprerja e marrëdhënieve ndërmjet Beogradit dhe Prishtinës, përkatësisht Beogradit dhe Tiranës, gjë që aktualisht paraqet një çështje jashtëzakonisht të rëndësishme politike”, thotë Berisha.

Ministri thekson se të gjitha çështjet që kanë të bëjnë me pozitën e shqiptarëve në komunat Preshevë, Bujanoc dhe Medvegjë nuk mund të krahasohen me çështjen e serbëve në Kosovë, për arsyen e thjeshtë se shqiptarët në këto komuna nuk janë të rrezikuar.

“Bëhet fjalë për një çështje politike që po keqpërdoret me qëllim të krijimit të një narrative simetrie dhe barazimi të situatave. Në momentin kur në Kosovë po mbahen për herë të tretë zgjedhje që nuk kanë arritur të zgjidhin krizën politike, përmes lidhjes së këtyre çështjeve po tentohet të imponohet përfundimi se situatat janë të njëjta. Kur flas për pozitën e shqiptarëve në Serbi, theksoj se si ministër për të drejtat e njeriut dhe të pakicave jam i njohur me këtë temë, dhe kjo është dëshmi se shqiptarët nuk diskriminohen në Republikën e Serbisë. Gjithashtu, fakti që Shaip Kamberi është deputet në Kuvendin e Serbisë, si dhe ekzistenca e Katedrës së Gjuhës Shqipe në Fakultetin Filologjik të Beogradit, e themeluar në vitin 1964, janë tregues shtesë. Po ashtu janë edhe kryetarët e komunave në Bujanoc dhe Preshevë, si dhe fakti që në shkolla përdoren tekste mësimore nga Shqipëria, gjë që flet në favor të kësaj”, thotë Berisha.

Ai më tej thekson se Serbia nuk do të lejojë ndikimet politike të Albin Kurtit, të cilat, sipas tij, aktualisht janë shumë të pranishme.

“Këtë e tregon edhe pozita e Ragmi Mustafës, i cili njëkohësisht është këshilltar i Albin Kurtit, këshilltar komunal në Bujanoc dhe përfaqësues i një partie politike, si dhe kandidat në zgjedhjet e ardhshme. Kjo tregon sa i fortë është ndikimi politik i Kurtit në rajon, jo vetëm në Preshevë dhe Bujanoc, por edhe në Maqedoninë e Veriut, ku struktura e tij politike vepron me një emër tjetër. Të gjitha këto përbëjnë procese politike të ndërlidhura që kanë për qëllim destabilizimin dhe dobësimin e Serbisë, por edhe lidhjen politike të Kosovës dhe Shqipërisë. Kjo mund të dëgjohej edhe nga deklaratat e ministrit të Punëve të Jashtme të Shqipërisë, i cili gjatë qëndrimit në Prishtinë tha se ‘kush prek Kosovën, prek Shqipërinë’”, shpjegon Berisha.

Ministri në Qeverinë e Serbisë thotë se, kur pati mundësinë të bisedonte me Keith Self dhe ekipin e tij, pikërisht këtë ua kishte vënë në dukje, ndërsa kongresmeni iu përgjigj se bëhej fjalë për një çështje politike dhe jo juridike të rrezikimit të shqiptarëve në Preshevë, Bujanoc dhe Medvegjë.

“Nuk pres që një raport i tillë të paraqitet në Departamentin e Shtetit. Përkundrazi, pas takimeve që pati në Beograd, ai vizitoi Këshillin Kombëtar të Komunitetit Kombëtar Shqiptar në Bujanoc, ndërsa takime u mbajtën edhe në Preshevë, interesant është fakti se ato u zhvilluan në një restorant dhe jo në institucione zyrtare. Kjo flet për mesazhet politike që po dërgohen. Ai tha qartë se propozimet e tij dhe ligji 64/11, të cilin e paraqiti para Departamentit të Shtetit, janë në fakt ide e diasporës shqiptare në Shtetet e Bashkuara të Amerikës. E gjithë kjo duhet parë në një kontekst më të gjerë. Deklaratat e Ragmi Mustafës dhe ngjarjet e vitit 1991 në Kosovë tregojnë më tej vazhdimësinë e disa narrativave të caktuara politike”, konsideron Berisha.

Ai vlerëson se bëhet fjalë për procese politike të ndërlidhura dhe shumë të rrezikshme, ndërsa qëllimi që po tentohet të paraqitet është mbështetja e strukturave në Prishtinë dhe jo një qasje neutrale ndaj problemeve.