Cakolli: Osmani nuk duhet të mbështesë asnjë parti, votat e saj nuk do t'i kthehen LDK-së

Eugen Cakolli nga Instituti Demokratik i Kosovës tregon për Kosovo online se nuk beson se për shkak të marrëdhënieve aktuale mes Vjosa Osmanit dhe Albin Kurtit, rreth 300 mijë votat që ajo fitoi në zgjedhjet e 2021 në listën e Vetëvendosjes, në zgjedhjet e ardhshme të planifikuara për 9 shkurt 2025, do t'i kthehen ish-partisë së saj, Bashkimit Demokratik të Kosovës.

“Pavarësisht marrëdhënieve aktuale mes Albin Kurtit dhe Osmanit, Osmani ende nuk ka dhënë asnjë shenjë për t'i drejtuar votuesit te ish-partia e saj LDK. Në anën tjetër, për mendimin tim, LDK-ja nuk ka bërë sa duhet për t'i kthyer votat e humbura për shkak të kalimit të Osmanit në listën e Vetëvendosjes”, thotë Cakolli.

Ai shton se votat që i fitoi Osmani derisa ishte pjesë e listës së Vetëvendosjes ishin pjesë e atmosferës së krijuar në vitin 2021., dhe se tandemi që u krijua mes saj dhe Kurtit është ai që e tërhoqi atë numër votash.

“Njerëzit që votuan për Vetëvendosje ishin një grup më i gjerë se partitë”, thotë Cakolli.

Sipas Kushtetutës së Kosovës, siç thekson ai, Osmani nuk duhet dhe nuk guxon të mbështesë asnjë parti politike sepse sipas mandatit kushtetues presidenti duhet të reflektojë unitet, dhe jo për të mbështetur parti të caktuara.

“Nga ana tjetër, edhe unë besoj se Osmani nuk ka fuqi reale mbi votuesit, edhe pse përfundimisht ajo mund të dëmtojë mbështetjen e Kutit nëse konflikti aktual mes saj dhe Kurtit vazhdon publikisht dhe publikohet gjerësisht nga të dyja palët. Megjithatë, e vetmja gjë që pres është që pikëpamjet e saj për çështje të tilla si hapja e urës apo marrëdhëniet mes qeverisë dhe administrates amerikane janë tema që do të ndikonin indirekt tek votuesit, duke pasur parasysh se Osmani ka një qëndrim që në thelb është refuzim i çdo lëvizje sovraniste pa konsultim dhe koordinim me partnerët”, thotë Cakolli.