Çoviq: Emigrimi i madh i serbëve nga Kosova është i sigurt nëse terrori i Kurtit vazhdon

Ish-shefi i Qendrës Koordinuese për Kosovë dhe Metohi, Nebojsha Çoviq, ka thënë sot se është e sigurt se do të ketë një emigrim të madh të popullit serb nga Kosova nëse kryeministri i Kosovës Albin Kurti vazhdon me terrorin e drejtuar kundër tyre, raporton RTV.

“Pyetja është nëse bashkësia ndërkombëtare e vëren se në Kosovë po bëhet spastrim etnik, pasi që gjatë dy viteve të qeverisjes së Albin Kurtit, 11 për qind e serbëve u larguan nga Kosova”, ka thënë Çoviq për TV K1, duke folur për situatën e sigurisë në Kosovë.

Ai vlerësoi se dhuna, presioni dhe represioni ndaj popullit serb kanë vazhduar në vazhdimësi jo vetëm gjatë dy viteve të fundit, sa ka qenë Kurti në pushtet, por edhe shumë më gjatë, dhe se është e mundur, siç shton, të krahasohen ngjarjet e fundit me ngjarjet e 17 marsit 2004.

“Shqiptarët natyrisht thonë se gjithçka ndodhi në mënyrë spontane atëherë. Atyre ngjarjeve u paraprinë bllokada në rrugën Prishtinë-Shkup, të shtëna me armë zjarri dhe në fund e gjithë kjo u përdor kur u vranë fëmijët shqiptarë. Menjëherë u njoftua se kishte të bënte me serbët, por nuk kishte asnjë lidhje me të. Dhe më pas, si në mënyrë spontane, filloi një ortek me më shumë se 50 mijë njerëz, duke rrënuar gjithçka përballë tyre dhe duke djegur gjithçka para tyre - shtëpi, manastire dhe kisha serbe, dhe kështu ushtroi një presion të fortë dhe spastrim etnik”, tha Çoviq.

Ai thekson se atëherë ky spastrim etnik është ndalur, por disa fshatra as sot e kësaj dite nuk janë ripopulluar nga serbët.

“Në atë kohë kishim një projekt të madh të kthimit, të cilin e punuam bashkë me UNMIK-un dhe me amerikanët, të gjitha fshatrat në të cilat u kthyen serbët, përveç Osojanit, u dogjën. Manastiret, kishat, Virgjëresha e Levishkës...Dhe pastaj lidershipi politik në krye me Ibrahim Rugovën tha: “Jo, jo, nuk është problem! Na jepni pavarësinë dhe gjithçka do të përfundojë””, tha Çoviq.

Ai vëren se Kurti gëzon mbështetje dhe se shtetet e Quint-it vetëm e kritikojnë atë në mënyrë të rreme.

“Shtrohet pyetja se çfarë po bënte EULEX dhe çfarë po bënte OEBS. EULEX-i ka në një shtyllë koordinimin e plotë të punës së strukturave policore në katër komuna në veri të Kosovës dhe Metohisë”, tha Çoviq.

Ai shtoi se pas largimit të serbëve nga policia multietnike, EULEX-i duhet ta kishte marrë përsipër.

"Dhe EULEX-i është paraqitur në formën e një vëzhguesi, gjoja pa kompetenca ekzekutive. Gjithashtu, EULEX-i ka autoritetin të mbikëqyrë punën e gjykatave. Nuk duhet të jetë e mundur që serbët të kalojnë një kohë të pakufizuar në burgje, paraburgimet zgjasin gjashtë apo tetë muaj”, tha Çoviq.

Ai gjithashtu thekson se KFOR-i duhet të garantojë sigurinë në Kosovë.

“Kfor duhet të garantojë sigurinë dhe menjëherë të marrë qëndrimet që duhet të marrë. Faktori ndërkombëtar duhet të vendoset shumë qartë, e jo të shpikin lëvizjen e ushtrisë serbe apo strukturave serbe të sigurisë. Quint-i nuk ka të drejtë të ndërhyjë në lëvizjet e formacioneve të sigurisë në Serbinë qendrore. I kemi dhënë të drejtën që të kujdesen për sigurinë në territorin e Kosovës dhe Metohisë dhe le të merren me të”, ka theksuar Çoviq.

Çoviq ka deklaruar ndër të tjera se nuk e kishte takuar kurrë Millan Radoiçiqin.

“Në Kosovë kam punuar nga viti 2001 deri në vitin 2005 dhe nuk e njoh, as nuk e kam takuar, as nuk ka qenë aktiv atëherë. Nuk kam asgjë për të gjykuar dhe vlerësuar. Nuk e di se cili është aktiviteti i tij politik. As që e kam njohur dhe nuk e di nëse e ka njohur edhe i ndjeri Olliver Ivanoviq”, ka thënë Çoviq.