Doniq: Cilat programe të MCC-së do të mbeten, do të përcaktohet sipas qëllimeve politike të Amerikës

Bashkëpunëtori i iniciativës "Rruga e Re e Tretë", Petar Doniq, deklaroi për Kosovo online se mbijetesa e marrëveshjes në fushën e energjetikës, me vlerë 236.7 milionë dollarë ndërmjet Millennium Challenge Corporation (MCC) dhe Kosovës, pas paralajmërimeve nga Uashingtoni për mbylljen e kësaj agjencie, do të varet shumë nga një vlerësim që do t’i bëhet të gjitha programeve të saj dhe që do të ndikohet nga qëllime të caktuara politike.

Sipas tij, një situatë e ngjashme ndodhi edhe me USAID-in, ku në fund u eliminuan 82 për qind e programeve, ndërsa u mbajtën vetëm 18 për qind.

„Gjatë shkurtimeve të buxhetit të USAID-it, palët në kuadër të programeve të ndryshme patën mundësinë të kërkojnë përjashtim dhe ta arsyetojnë atë. Më pas të gjitha këto raste u shqyrtuan individualisht, në bazë të rëndësisë globale të programit dhe nëse ai mbështet interesin amerikan në aspektin e politikës së jashtme. Me shumë gjasë, ky parim do të zbatohet edhe në këtë rast, ndërsa kriteri për vendimmarrje mbetet i fshehtë dhe bazohet në qëllime politike që nuk janë publike“, tha Doniq.

Sipas vlerësimit të tij, një investim me vlerë 236.7 milionë dollarë për një rajon të vogël si Kosova është shumë i madh.

"Të gjithë do të kenë interes të luftojnë për veten e tyre, por do të jetë shumë e vështirë për këdo të gjejë kompensim, veçanërisht në kushtet aktuale të tregut. Në Nepal, një program i MCC është gjithashtu nën pikëpyetje dhe qeveria e tyre po shkruan një peticion për të devijuar fondet nga burime të tjera, pasi kjo është axhenda, për të centralizuar të gjitha agjencitë e pavarura brenda Departamentit të Shtetit, kështu që disa programe do të mbahen dhe disa jo, varësisht nga qëllime të caktuara politike për rajonin në të cilin zbatohen programet", thotë Doniq.

Ai kujton edhe rastin me marrëveshjen e nënshkruar midis Serbisë dhe DFC-së, gjatë mandatit të parë të Donald Trump, mbi bazën e së cilës do të realizoheshin projekte zhvillimore me vlerë 50 milionë dollarë për rajonin.

"Kur administrata amerikane u zëvendësua, ajo agjenci nuk e vazhdoi punën e saj, kështu që ekziston një precedent që kur vjen një qeveri e re, ajo ka axhendën e vet dhe dëshiron ta zbatojë atë, dhe disa marrëveshje të mëparshme mund të rishqyrtohen lehtësisht”, thekson Doniq.