Gjuriq: Kurti paraqet një shembull të keq të nxënësit të ideologjive totalitare

Ministri i Punëve të Jashtme të Serbisë, Marko Gjuriq, deklaroi për Njuzmaks Balkans se Albin Kurti paraqet një shembull të keq të një nxënësi të ideologjive totalitare dhe se nuk ekziston asnjë arsye kredibile pse Serbia do të besonte se shpërblimi i qeverisë së tij nuk do të çonte në një politikë edhe më represive dhe më negative ndaj Serbisë.

Gjuriq theksoi se Serbia kundërshton dhe punon aktivisht që të mos lejojë që “veprimet e njëanshme dhe të pakoordinuara të regjimit të Kurtit të shpërblehen”.

“Prishtina në katër vitet e fundit ka zbatuar një politikë diskriminimi, përjashtimi të serbëve, moszbatimi të obligimeve ndërkombëtare të marra dhe nuk ekziston asnjë arsye kredibile që ne të besojmë se shpërblimi i qeverisë së Kurtit nuk do të rezultojë në një politikë edhe më represive dhe negative ndaj Serbisë. Pra, do të thoja se Kurti paraqet një shembull të keq të një nxënësi të ideologjive totalitare. E di që kjo tingëllon mjaft ashpër, por ai me veprimet e tij në katër vitet e fundit ka treguar se është në gjendje të zhgënjejë edhe ata që i kanë dhënë shumë mundësi duke menduar se ai është një person me të cilin mund të dialogohet”, theksoi Gjuriq.

Ai nënvizoi se Serbia do të vazhdojë të kujdeset për popullin e saj në Kosovë.

“Para së gjithash, njerëzit tanë duhet ta dinë se për ne Kosova dhe Metohia janë në zemër, njësoj si çdo pjesë tjetër e vendit tonë, madje, duke pasur parasysh rëndësinë historike, kulturore dhe shpirtërore, ndoshta edhe më shumë. Ne do të vazhdojmë të kujdesemi për njerëzit tanë në Kosovë dhe Metohi. Shpenzimet materiale të qeverisë për qytetarët individualë vazhdojnë të rriten. Dhe ky kujdes për njerëzit, kujdes për ata që ndoshta në periudhën e kaluar nuk kanë marrë mjaftueshëm, do të jetë fokusi i qeverisë në periudhën e ardhshme”, tha ministri.

Ai gjithashtu paralajmëroi vazhdimin e një beteje intensive diplomatike në arenën ndërkombëtare për mbrojtjen e pozitës së Serbisë.

“Ne do të vazhdojmë të ndërmarrim gjithçka që mundemi për të eliminuar çdo kërcënim dhe rrezik, fizik apo tjetër, ndaj njerëzve tanë. Dhe besoni, garancia më e fortë për sigurinë e popullit tonë, nëse duam të jemi realistë dhe objektivë, qëndron në fuqinë ekonomike, politike dhe madje ushtarake të Serbisë, por edhe në vendosmërinë e udhëheqjes së saj për të qëndruar pas popullit tonë. Duke njohur presidentin Vučić dhe të tjerët në ekipin tonë që merren me këtë, e dimë se ekziston një mur i pathyeshëm ndaj atyre që duan ta përvetësojnë Kosovën dhe Metohinë dhe ta bëjnë një territor joserb, dhe jam i bindur se në afat të gjatë interesat tona dhe lufta jonë do të mbizotërojnë”, theksoi Gjuriq.

Serbët duan një kapitull të ri në marrëdhëniet me SHBA-në

Ai foli edhe për marrëdhëniet me SHBA-në dhe theksoi se serbët dëshirojnë një kapitull të ri në marrëdhëniet me Shtetet e Bashkuara të Amerikës dhe se Serbia përpiqet të shfrytëzojë çdo mundësi për të forcuar bashkëpunimin me Uashingtonin.

Gjuriq, në një intervistë për “Qëndrimi i javës”, përshëndeti vendimin e SHBA-së për t’i zgjatur kompanisë MOL afatin për zgjidhjen e çështjes së NIS për edhe dy muaj, duke theksuar se “për Serbinë është jashtëzakonisht e rëndësishme që në bashkëpunim me administratën amerikane janë gjetur mekanizma për mbrojtjen e interesave kombëtare serbe në sektorin energjetik”.

Duke folur për rrethanat aktuale gjeopolitike, Gjuriq vlerësoi se konfliktet në Evropë dhe tensionet globale “nuk janë lajm i mirë për kontinentin, veçanërisht për shtetet e vogla dhe të mesme”.

“Në vitin e fundit kemi pasur një dialog intensiv me nivelin më të lartë të administratës amerikane, kemi shpjeguar pozicionin e Serbisë dhe mendoj se kemi arritur të krijojmë një klimë pozitive që historikisht ka ekzistuar mes vendeve tona”, tha ministri, duke shtuar se beson që kjo “është marrë parasysh edhe gjatë vendimit për zgjatjen e lejeve për furnizim për kompaninë NIS, e cila ende ka shumicë pronësie ruse”.

Gjuriq theksoi se është krenar që si ambasador dhe tani si ministër i jashtëm punon për përmirësimin e marrëdhënieve serbo-amerikane, duke shtuar se është në interes të Serbisë të forcojë pozitën në Uashington, të përmirësojë instrumentet e bashkëpunimit dhe të rrisë rolin e komunitetit serb në Amerikë.

Duke folur për dimensionin politik të marrëdhënieve, ai vlerësoi se midis Serbisë dhe administratës së presidentit Donald Trump ekziston një nivel i lartë përputhshmërie në shumë çështje ideologjike dhe vlerash, si dhe nevoja për bashkëpunim pragmatik në fushën e ekonomisë.

Sipas tij, fakti që Serbia është një vend i pavarur, sovran dhe krenar, ngjall respekt në një pjesë të konsiderueshme të elitës politike amerikane.

“Nuk është sekret që serbët në Amerikë kanë mbështetur masivisht zgjedhjen e presidentit Trump dhe se ai gëzon popullaritetin më të madh në Serbi krahasuar me pjesë të tjera të Evropës”, përfundoi Gjuriq.