Gjuriq: Partneriteti strategjik me Francën po përparon vazhdimisht; Barrot: Duam që Serbia të jetë në BE

Ministri i Punëve të Jashtme të Serbisë, Marko Gjuriq, theksoi se e ka njohur ministrin për Evropën dhe Punët e Jashtme të Francës, Jean-Noël Barrot, i cili po qëndron për vizitë në Serbi, me problemet me të cilat përballen serbët në Kosovë. Ministri francez deklaroi sot se vendi i Serbisë është në një Bashkim Evropian të fortë dhe të fuqishëm dhe se Parisi mbështet aspiratat e saj për t’u bërë pjesë e BE-së, duke theksuar se, sa i përket dialogut ndërmjet Beogradit dhe Prishtinës, palët duhet të zbatojnë obligimet që kanë nënshkruar.

“Biseduam edhe për situatën në Kosovë dhe Metohi dhe e informova kolegun tim francez për problemet me të cilat përballet popullsia jonë në këtë territor. Vura në dukje intensifikimin e presioneve gjatë vitit të kaluar dhe e informova për gjendjen në të cilën ndodhen njerëzit tanë”, tha Gjuriq në konferencën e përbashkët për media.

Ai tha se është nder për të që pret përfaqësuesin e një vendi që ka rëndësi të jashtëzakonshme për Serbinë, si politikisht, ekonomikisht, kulturalisht, ashtu edhe në fusha të tjera, një vend me të cilin ekziston partneritet strategjik.

Gjuriq theksoi se këtë vit shënohen 15 vjet të partneritetit strategjik ndërmjet Serbisë dhe Francës dhe se kjo vizitë ka karakter historik.

“Biseduam për marrëdhëniet e përgjithshme bilaterale. Kam kënaqësinë të them se këto marrëdhënie karakterizohen nga përparim i vazhdueshëm, i bazuar në marrëdhënien shumë të afërt mes dy presidentëve, Emmanuel Macron dhe Aleksandar Vuçiq. Këto marrëdhënie kanë rezultuar me një lulëzim të vërtetë të bashkëpunimit ekonomik në vitet e fundit. Në disa vitet e fundit ka pasur një rritje të madhe të investimeve franceze. Së bashku me partnerët francezë po modernizojmë infrastrukturën tonë”, shpjegoi ai.

Gjuriq theksoi se me Barrot kanë biseduar se si ta bëjnë këtë partneritet strategjik, i cili vazhdimisht po përparon, edhe më efikas dhe më të mirë.

Në këtë kontekst, ai vuri në dukje se Barrot gjatë vizitës në Beograd ka nënshkruar dy dokumente, gjë që e cilësoi si konfirmim të zhvillimit të marrëdhënieve.

“Kemi një dialog politik shumë të zhvilluar në nivel të lartë. Me mysafirin diskutuam të gjitha çështjet e rëndësishme lidhur me integrimet evropiane, ku prioritet strategjik i Serbisë është anëtarësimi sa më i shpejtë në BE. Jemi mirënjohës presidentit Macron dhe ministrit Barrot për vizionin e një Evrope të madhe, të fortë dhe të bashkuar, e cila do të konsolidojë forcat për t’iu përgjigjur së bashku sfidave me të cilat përballet kontinenti. Pasojat e zhvillimeve na prekin të gjithëve sot më shumë se kurrë dhe është më e nevojshme se kurrë të punojmë së bashku”, shpjegoi Gjuriq.

Ai falënderoi Francën për mbështetjen për hapjen e Klasterit 3 dhe paralajmëroi se Serbia do të dyfishojë përpjekjet në zbatimin e agjendës evropiane për t’u pranuar sa më shpejt në BE.

Gjuriq shtoi se me Barrot ka biseduar edhe për veprimet e përbashkëta në nivel rajonal.

Ai falënderoi Francën për pjesëmarrjen në Expo 2027, duke theksuar se për Serbinë Expo është diçka nga e cila pritet të ketë një rol transformues për Beogradin dhe Serbinë.

“Gëzohemi për faktin se Franca do të jetë e përfaqësuar në Expo”, theksoi shefi i diplomacisë serbe.

Gjuriq paralajmëroi se pas takimit me Barrot do të vendosë kurora lulesh në Monumentin e Mirënjohjes ndaj Francës.

“Mund të them se në zemrat e qytetarëve të Serbisë ekziston një miqësi e madhe historike dhe kujtesë për aleancën që ka ekzistuar në periudha të ndryshme, dhe jemi të vendosur ta forcojmë këtë aleancë”, tha Gjuriq.

Barrot: Ne duam dhe e mbështesim që Serbia të jetë në BE

Ministri francez për Evropën dhe Punët e Jashtme, Jean-Noël Barrot, deklaroi sot se vendi i Serbisë është në një Bashkim Evropian të fortë dhe të fuqishëm dhe se Parisi mbështet aspiratat e saj për t’u bërë pjesë e BE-së, duke theksuar se, sa i përket dialogut ndërmjet Beogradit dhe Prishtinës, palët duhet të zbatojnë obligimet që kanë nënshkruar.

“Do të doja të dërgoja një mesazh të dyfishtë. I pari ka të bëjë me miqësinë midis Serbisë dhe Francës, e cila mishërohet në bashkëpunimin mes qytetarëve dhe dy ekonomive. Mesazhi i dytë është të konfirmoj se vendi i Serbisë është në Evropë, në Bashkimin Evropian, të fortë dhe të fuqishëm, i cili do t’i mundësojë si Francës ashtu edhe Serbisë të përballen me sfidat. Ne duam që Ballkani Perëndimor të jetë pjesë e Evropës”, tha Barrot.

Në këtë kuadër, ai theksoi se Franca mbështet aspiratat e Serbisë për t’u bërë pjesë e BE-së, duke kujtuar se ekzistojnë kritere të caktuara për anëtarësim, të bazuara në merita.

“Franca është në anën tuaj”, theksoi Barrot.

Duke përmendur se duhet të përfundojnë të gjitha detyrat në lidhje me REM-in dhe rekomandimet e Komisionit Evropian në fushën e drejtësisë, pasi standardet janë vendosur lart dhe rruga drejt BE-së është e gjatë, Barrot theksoi se po punohet në këtë drejtim, prandaj Franca ka mbështetur hapjen e Klasterit 3 në kuadër të negociatave ndërmjet BE-së dhe Serbisë.

Sa i përket dialogut ndërmjet Beogradit dhe Prishtinës, Barrot tha se palët duhet të zbatojnë obligimet që kanë nënshkruar.

Duke folur për partneritetin strategjik midis dy vendeve, Barrot tha se ato bashkëpunojnë në politikë, ekonomi, në fushën e infrastrukturës së transportit, zhvillimit të qëndrueshëm, përpunimit të ujërave të ndotura, inteligjencës artificiale, ndërsa po diskutohen edhe mundësi të reja bashkëpunimi në lidhje me programin civil bërthamor. Ai shtoi se kompania franceze “Bull” do të dorëzojë një “superkompjuter” në kuadër të këtij partneriteti strategjik.

“Ky partneritet ekziston prej 15 vitesh dhe ramë dakord të hartojmë një udhërrëfyes për ta bërë zbatimin e tij edhe më domethënës. Agjencia Franceze për Zhvillim, e cila vepron në Serbi që nga viti 2019, ka edhe linja të caktuara buxhetore që lidhen me tranzicionin ekologjik. Jemi të gatshëm të mbështesim pavarësinë e Serbisë në sektorin e energjisë”, tha Barrot.

Sipas tij, Serbia brenda BE-së do të mund të forcojë pavarësinë strategjike dhe çdo lloj tjetër të pavarësisë.

Duke iu përgjigjur pyetjes së gazetarëve, ai përsëriti se Franca mbështet hapjen e Klasterit 3.

“Presidenti në vitin 2023 në Bratislavë tha se në botë po fillon të mbizotërojë ligji i më të fortit dhe se duhet të jemi të përgatitur të përgjigjemi si një Evropë e fortë ndaj një force të tillë. Nuk mund të forcohemi nëse e lëmë anash Ballkanin Perëndimor”, tha Barrot.

Ai shtoi se Franca e ndjek Serbinë në rrugën drejt BE-së, duke theksuar se anëtarësimi është një proces kompleks, sepse nuk ka të bëjë vetëm me ekonominë dhe përparimin, por edhe me orientimet intime të qytetarëve, rregullat kushtetuese dhe demokracinë.

“Rruga është kërkuese dhe për këtë arsye ne e shoqërojmë Serbinë, si edhe vendet e tjera, në zbatimin e reformave. E inkurajojmë Serbinë dhe nuk duam që populli serb të dekurajohet apo të humbasë dëshirën për t’u anëtarësuar në BE. Unioni do të pasurohet me pranimin e Serbisë dhe është thelbësore që kjo ide të mbetet e gjallë mes qytetarëve”, tha Barrot.

Gjuriq, duke iu përgjigjur pyetjes për vizitën e ardhshme të delegacionit të Parlamentit Evropian në Serbi, tha se nuk është sekret se në Serbi ekziston bindja se disa eurodeputetë që merren me raportimin për Serbinë nuk kanë një qasje objektive ndaj realitetit.

“Delegacioni do të pritet nga zyrtarët e Serbisë dhe përfaqësuesit e institucioneve zyrtare. Niveli i pritjes është e drejta jonë sovrane dhe diskrecionale për ta vendosur vetë”, shpjegoi ai.

Gjuriq theksoi se kësaj pamjeje nuk i ndihmon fakti që një nga përfaqësuesit më të spikatur të Parlamentit Evropian ka publikuar një fotografi të tij me armë automatike nga koha e luftës kundër serbëve, në përvjetorin e operacionit “Stuhia”, si dhe ngjarje të ngjashme që pasqyrojnë qëndrimet e disa anëtarëve.

“Mendoj se këto dallime ideologjike nuk duhet të hedhin hije mbi bashkëpunimin tonë me Parlamentin Evropian në përgjithësi. Shpresoj që të paktën pjesërisht ata që do të vijnë në Beograd të jenë të gatshëm të vendosen në pozicionin tonë dhe të dëgjojnë argumentet tona”, theksoi Gjuriq.

Lidhur me çështjen e Groenlandës

Kur u pyet për Groenlandën, Barrot kujtoi se Franca shprehu mbështetjen dhe solidaritetin e saj ndaj Danimarkës, pasi dëshiron të mbështetet në solidaritetin dhe mbështetjen e partnerëve të saj në BE dhe NATO nëse gjendet në të njëjtën situatë.

"Pjesëmarrja e Francës në ushtrimet e Qëndrueshmërisë Arktike është një dëshmi e kësaj mbështetjeje dhe solidariteti", shtoi Barrot.

Ministri Gjuruq deklaroi se Serbia mirëpret diskutimet mbi këtë temë në Shtëpinë e Bardhë, duke theksuar se respektimi i Kartës së OKB-së është thelbësor për marrëdhëniet ndërkombëtare në tërësi.

"Në bisedë, i përshkruam mysafirit ndjenjat e qytetarëve të Serbisë mbi këtë temë dhe ndjeshmërinë tonë të veçantë kur bëhet fjalë për respektimin e integritetit territorial dhe sovranitetit, sepse që nga viti 2008 edhe ne jemi përballur me një situatë specifike kur bëhet fjalë për Kosovën dhe Metohinë. Në këtë kuptim, do të thoja se nuk është në fushëveprimin tonë të përfshihemi aktivisht në këtë çështje, por Serbia vazhdimisht i përmbahet parimeve të OKB-së, në çdo rast pa përjashtim. Gjëra të tilla mund të zgjidhen vetëm përmes bisedës”, tha Gjuriq.