Gogiq: Serbët janë viktima të përplasjes mes pushtetit dhe opozitës në Prishtinë

Politologu Ognjen Gogiq vlerëson se ndërhyrja e Policisë së Kosovës në ambulancën serbe në Obiliq është pjesë e përplasjes parazgjedhore mes pushtetit dhe opozitës në Prishtinë, ndërsa serbët janë “dëm kolateral”, shkruan RT Balkan.

Duke reaguar ndaj mbylljes së djeshme të ambulancës në Obiliq, e cila funksionon sipas sistemit serb, ai kujtoi se një incident i ngjashëm ndodhi së fundmi në komunën e Skenderajt, ku gjithashtu u mbyllën ambulanca në dy fshatra serbe.

“Në Skenderaj në pushtet është opozita, kryetar është Sami Lushtaku, ish-pjesëtar i UÇK-së. Ai e inicioi ndërhyrjen në ambulancat serbe. Në Obiliq erdhi inspektorati nga Prishtina. Kjo më tregon se opozita po e sfidon Albin Kurtin dhe po thotë: ‘nuk je vetëm ti ai që mbyll institucionet serbe, këtë mund ta bëjmë edhe ne’”, deklaroi Gogiq për RT Balkan.

“Me këtë veprim, Prishtina sikur po teston Bashkimin Evropian dhe seriozitetin e paralajmërimeve që ai ka bërë. Këtu në shënjestër ishin institucionet shëndetësore në komunat e Skenderajt dhe Obiliqit, vende ku serbët janë pakicë, pra enklava. Goditet aty ku serbët janë më të cenueshëm”, tha Gogiq.

Ai kujtoi se ambulancat në Skenderaj, në fshatrat Suhoërlla dhe Banjë, kanë vazhduar punën, ndërsa për ambulancën në Obiliq mbetet të shihet nëse BE-ja do të reagojë dhe do ta detyrojë palën shqiptare të mundësojë vazhdimin e punës së punëtorëve shëndetësorë serbë.

Ai theksoi gjithashtu se sistemet e shëndetësisë dhe arsimit janë më të cenueshmet, se janë nën presion dhe se kjo praktikë po vazhdon.

“E dimë se nga 15 marsi në Kosovë ka filluar zbatimi i Ligjit për të Huajt. Atëherë nga BE-ja erdhi një udhëzim, Peter Sorensen ishte në Prishtinë dhe u pranua që serbët që jetojnë dhe punojnë në Kosovë të përjashtohen nga Ligji për të Huajt, në mënyrë që të mos detyrohen të largohen nga shtëpitë e tyre”, tha ai.

Ai kujtoi se Prishtinës i është përcjellë disa herë mesazhi se nuk duhet të rrezikohet funksionimi i sistemit shëndetësor dhe arsimor, duke përfunduar se këtë, në kuadër të fushatës zgjedhore, po e bëjnë si pushteti ashtu edhe opozita.

Gogiq thotë se duhet pasur parasysh se tashmë javën e ardhshme në Kosovë mbahen zgjedhjet e jashtëzakonshme parlamentare dhe se këto janë zgjedhjet e treta në 16 muajt e fundit.

“Vetë fakti që zgjedhjet mbahen kaq shpesh tregon për një degradim të mëtejshëm të institucioneve dhe të rendit që ekziston në Kosovë dhe Metohi, dhe kjo është pjesë e shpjegimit për atë që po u ndodh serbëve. Ata janë dëm kolateral i përplasjes mes shqiptarëve”, vlerëson ky analist.

Ai kujtoi gjithashtu ndërhyrjen në tri stacione hekurudhore në veri të Kosovës, kur Policia e Kosovës me disa automjete të njësive speciale bllokoi qasjen në stacionet hekurudhore dhe më pas vendosi flamurin e Kosovës dhe tabelën me mbishkrimin “Infrakos”.

“Ndërhyrja në objektet hekurudhore ndodhi ditën e parë të fushatës. Kurti vazhdon politikën e tij të marrjes nën kontroll të institucioneve serbe. Ai mori ndërtesa të zbrazëta, por e paraqiti këtë si një ritual sikur e kishte çliruar Kosovën. Ai i ka mësuar votuesit të dëgjojnë mesazhin se e qeveris Kosovën me dorë të fortë, por kjo nuk mjafton më, sepse ka ardhur deri te zhgënjimi i njerëzve”, tha Gogiq.