Jevtiq: Dita kaloi në përputhje me marrëveshjen, u pengua pogromi administrativ ndaj serbëve nga Kosova

Nënkryetari i Listës Serbe, Dallibor Jevtiq, theksoi se që nga ardhja në pushtet e Albin Kurti në Prishtinë, procesi i marrjes së dokumenteve të Kosovës ishte pothuajse i pamundur dhe se ishte e qartë që ndaj serbëve po zbatohej “modeli kroat”. Prandaj, sipas tij, marrëveshja lidhur me Ligjin për të huajt është e rëndësishme, sepse me të është parandaluar një pogrom administrativ ndaj serbëve nga Kosova.

Jevtiq për Newsmax Balkans deklaroi se dita e parë e punës pas fillimit të zbatimit të Ligjit për të huajt kaloi ashtu siç ishte rënë dakord.

“Dita e parë e punës pas gjithçkaje që kemi pasur në periudhën e mëparshme, presionit për shkak të paralajmërimit për mënyrën e zbatimit të ligjit, kaloi ashtu siç u tha nga udhëheqja jonë shtetërore dhe Zyra për Kosovë dhe Metohi, normalisht dhe në mënyrë të zakonshme në rrethana kur arritëm marrëveshjen dhe arritëm të ruajmë dhe të parandalojmë atë që ishte qëllimi i autoriteteve në Prishtinë – dëbimin e një numri të caktuar serbësh që jetojnë dhe punojnë në Kosovë dhe Metohi”, shpjegoi ai.

Jevtiq theksoi se në Kosovë jetojnë rreth 7.200 persona që nuk kanë dokumente të Kosovës, por kanë të drejtë t’i marrin ato, si dhe persona që kanë dokumente nga Serbia qendrore dhe që punojnë ose studiojnë në Kosovë, të cilët janë rreth 10.000.

“Që nga ardhja e Kurtit në pushtet, procesi i marrjes së dokumenteve të Prishtinës ishte i pamundur. Bënin gjithçka dhe vendosnin pengesa burokratike për këdo që donte të merrte dokumente, në mënyrë që të mos i merrte ato. Ishte e qartë se po zbatohej modeli kroat. Ishte i qartë qëllimi dhe synimi i regjimit aktual në Prishtinë”, theksoi ai.

Ai shtoi se është një mesazh i mirë që Bashkimi Evropian do të monitorojë zbatimin e marrëveshjes, por theksoi se marrëveshja është një sukses i madh i diplomacisë së Serbisë, i udhëheqjes shtetërore, i presidentit Aleksandar Vuçiq, i Zyrës për Kosovë dhe Metohi dhe i Listës Serbe që ka punuar në terren.

“Për disa muaj thuhej se Beogradi hesht, se Lista Serbe, si partia më e madhe e serbëve në Kosovë, nuk bën asgjë. Gjatë gjithë kohës kemi punuar së bashku për të parandaluar atë që ishte qëllimi i Albin Kurtit – një formë e re e pogromit administrativ ndaj serbëve”, nënvizoi Jevtiq.

Duke shpjeguar detajet teknike të marrëveshjes, ai tha se negociatat janë zhvilluar nga drejtori i Zyrës për Kosovë dhe Metohi, Petar Petkoviq, dhe se i gjithë procesi ka zgjatur disa muaj.

“Problemi ishte se në Kosovë dhe Metohi kishim disa procese zgjedhore, zgjedhjet parlamentare në shkurt, pastaj dy raunde të zgjedhjeve lokale në tetor dhe nëntor dhe përsëri zgjedhje parlamentare në dhjetor. Kjo ishte problematike në aspektin politik. Kurti me qëllim i shkaktonte këto kriza për të thënë se nuk ka institucione, e as kapacitet për të vendosur për disa çështje. Por mund të bënte gjithçka për t’u shkaktuar dëm serbëve, ndërsa me arsyetimin se nuk ka institucione, nuk mund të zhvillonte dialog”, tha Jevtiq.

Ai theksoi veçanërisht se kjo marrëveshje është e rëndësishme për serbët e zhvendosur dhe i ftoi ata ta shfrytëzojnë këtë mundësi për të marrë dokumente të Prishtinës.

“I ftoj të gjitha personat e zhvendosur që kanë të drejtë të marrin dokumente të Prishtinës ta bëjnë këtë. Kjo është një mundësi dhe shans që, me garancitë e BE-së, të hiqen të gjitha pengesat burokratike dhe ata të realizojnë të drejtat e tyre, të marrin dokumente, por edhe të drejta kur bëhet fjalë për pronën”, tha Jevtiq.

Sa i përket Ligjit për automjetet, Jevtiq tha se udhëheqja shtetërore e Serbisë vazhdon të punojë për zgjidhjen edhe të këtij problemi.

“Jemi afër një zgjidhjeje të mirë në interes të njerëzve të zakonshëm. Ndërkohë, përfaqësuesit tanë në institucione, të zgjedhur ligjërisht dhe legjitimisht, do të jenë në shërbim të qytetarëve për t’i ndihmuar nëse kanë probleme, në mënyrë që t’i zgjidhim së bashku”, tha Jevtiq.

Duke folur për 22-vjetorin e pogromit të serbëve në Kosovë, që shënohet nesër, Jevtiq përsëriti se pikërisht me marrëveshjen për Ligjin për të Huajt është parandaluar një pogrom administrativ ndaj serbëve.

“Nëse nuk do të kishim marrëveshje, dita e sotme do të ishte ndryshe, me pyetjen se çfarë do të ndodhte me mijëra serbë që ndoshta do të duhej të largoheshin nga Kosova dhe Metohia”, theksoi Jevtiq.

Ai shtoi se situata nuk është aspak e lehtë dhe është larg ideale, dhe se serbët në Kosovë do të donin më së shumti të mos kishin nevojë të flisnin për këtë temë, por duhet të gjenden zgjidhje praktike për të shmangur dëme më të mëdha për popullin serb.

“Do të vazhdojmë të luftojmë, nuk heqim dorë nga qëllimi ynë, e ai është qëndrimi dhe mbijetesa e serbëve në Kosovë dhe Metohi”, përfundoi Jevtiq.

Lidhur me deklaratën se rruga drejt normalizimit të marrëdhënieve është e gjatë, ai tha se duke pasur parasysh se kush është në pushtet në Prishtinë, kjo është sigurisht e vërtetë, por se ata shpresojnë për kohë më të mira.