KFOR u tërhoq para Komunës së Zveçanit: Po qëndrojmë në zonë, do të bëjmë patrullime të rregullta

Pjesëtarët e KFOR janë tërhequr sot para ndërtesës së Komunës së Zveçanit.

Siç kanë deklaruar nga KFOR për Kosovo online, “gjendja në komunën e Zveçanit është stabilizuar dhe si rrjedhojë, njësitë e batalionit të forcave rezervë operative të misionit të KFOR të drejtuar nga NATO nuk do të jenë më të pranishme në ndërtesën e komunës”.

"Në vend të kësaj, ata do të qëndrojnë në zonë dhe do të kryejnë patrulla të rregullta për të siguruar një mjedis të sigurt për të gjithë njerëzit që jetojnë në komunën e Zveçanit. KFOR vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB të vitit 1999 – për të siguruar një mjedis të sigurt dhe siguri për të gjitha komunitetet që jetojnë në Kosovë dhe liri të lëvizjes, në çdo kohë dhe në mënyrë të paanshme KFOR është përgjigja e tretë e sigurisë, pas Policisë së Kosovës dhe Misionit të BE për Sundimin e Ligjit (EULEX), respektivisht, me të cilët punojmë në bashkëpunim të ngushtë ”, kanë thënë nga Kfor për Kosovo online.

Nuk ka pjesëtarë të KFOR as në ndërtesën e komunës, përballë së cilës tashmë ndodhet një autoblindë i Policisë së Kosovës, pjesëtarë të Policisë së Kosovës, si dhe forcat speciale.
Të pranishëm janë edhe pjesëtarët e EULEX.

Ushtarët e KFOR u vendosën para ndërtesës komunale në Zveçan më 29. maj 2023, kur pati një konflikt me serbët vendas, të cilët po protestonin për ardhjen e kryetarëve të paligjshëm në veri të Kosovës.

Kujtojmë se më 12. janar, pjesëtarët e KFOR-it janë tërhequr nga afërsia e objektit komunal në Leposaviq.

Nga Kfor më pas thanë se po i përshtateshin situatës në terren bazuar në një vlerësim të sigurisë.