Kurti: Me Sorensenin diskutuam për normalizimin e marrëdhënieve me Serbinë, të bazuar në njohjen e ndërsjellë

Kryeministri i Kosovës, Albin Kurti, bëri të ditur se me të dërguarin e posaçëm të Bashkimit Evropian për dialogun mes Beogradit dhe Prishtinës, Peter Sorensen, ka diskutuar për rrugën e Kosovës drejt anëtarësimit në Bashkimin Evropian, si dhe për perspektivat e normalizimit të plotë të marrëdhënieve me Serbinë, të bazuar në njohjen e ndërsjellë.

Kurti shkroi në rrjetin social “X” se ishte takuar me Sorensenin në margjinat e Forumit të Paqes në Paris.

“Diskutuam për stabilitetin e plotë institucional që Kosova gëzon tani pas zgjedhjes së presidentit, rrugën e Kosovës drejt anëtarësimit në Bashkimin Evropian, si dhe perspektivat për normalizimin e plotë të marrëdhënieve me Serbinë, të bazuar në njohjen e ndërsjellë”, përfundoi Kurti.

Më herët, përfaqësuesi i posaçëm i BE-së për dialogun mes Beogradit dhe Prishtinës, Peter Sorensen, kishte theksuar se me kryeministrin e Kosovës, Albin Kurti, kishte diskutuar për hapat e ardhshëm në dialog.