Lista Serbe: Përfaqësuesve të partisë u është dorëzuar thirrja e prokurorit, vazhdim i presionit institucional

Lista Serbe njoftoi sot se përfaqësuesve të partisë, Igor Simiqit, Ivan Zaporoshcit, Ivan Todosijeviqit, Zoran Todiqit dhe Vasillije Tomasheviqit, u është dorëzuar thirrja e prokurorit lidhur me procedurën që zhvillohet ndaj tyre që nga viti 2024, duke theksuar se kjo paraqet vazhdim të presionit institucional dhe pjesë të një plani të drejtuar kundër serbëve.

„Përfaqësuesve të Listës Serbe, Igor Simiqit, Ivan Zaporoshcit, Ivan Todosijeviqit, Zoran Todiqit dhe Vasillije Tomasheviqit, u është dorëzuar thirrja nga prokurori themelor në Mitrovicën e Veriut që, në cilësinë e të pandehurve, të japin deklarata më 13 gusht“, thuhet në njoftimin e Listës Serbe.

Bëhet fjalë, siç shtohet, për një procedurë që ndaj tyre po zhvillohet që nga momenti kur Policia e Kosovës hyri në institucionet serbe, dy vjet më parë.

„Atyre u atribuohet falsifikim i pretenduar i dokumentacionit, që, e përkthyer, do të thotë se po ndiqen penalisht sepse ishin në krye të institucioneve serbe që Prishtina nuk i njeh. Kjo paraqet pjesë të një plani më të gjerë të drejtuar kundër popullit serb dhe vazhdim të presionit institucional ndaj të gjithë atyre që qëndrojnë pranë popullit të tyre dhe mbrojnë të drejtën e tij për të mbijetuar“, porosit Lista Serbe.

Ndryshe, pjesëtarët e Policisë së Kosovës hynë në gusht të vitit 2024 në ndërtesat e organeve të përkohshme në katër komuna serbe në veri, si dhe në institucione të tjera që funksiononin në sistemin e Serbisë, nga të cilat morën një pjesë të dokumentacionit.

Nënkryetari i Listës Serbe, Dragisha Milloviq, deklaroi atëherë se ardhja e policisë në veri të Kosovës kishte vetëm një qëllim – frikësimin e popullit, në mënyrë që ai të shpërngulej.