Llanski: Serbia është një vend kyç në rajon, Prishtinës i mungon gatishmëria për dialog

Vendimet të cilave u drejtohet Kosova, siç është heqja e dinarit në transaksionet e pagesave – nuk janë të zgjuar dhe tregojnë se Prishtinës i mungon gatishmëria për dialog, vlerëson eksperti për Ballkanin, avokati austriak Gabriel Llanski.

Llanski për Kosovo online, duke komentuar lëvizjet e fundit të qeverisë së Kosovës, ka theksuar se duhet të vazhdohet bashkëpunimi në të gjitha fushat, prandaj heqja e dinarit dhe masa të ngjashme nuk janë as të mira e as të zgjuara.

“Besoj se për momentin mungon vullneti për të arritur komunikim dhe dialog dhe pa këtë nuk do të funksionojë”, tha Llanski, zyra e avokatisë së të cilit organizoi promovimin e botimit serb të librit të ish të dërguarit të BE-së për Kosovën, Volfgang Petriç, në Beograd.

Llanski theksoi se Serbia është një vend kyç në rajon dhe se do të ishte mirë që ajo të gjente një zgjidhje për çështjen e Kosovës.

"Serbia është një vend kyç në rajon. Ajo e luajti dhe do ta luajë atë rol. Do të ishte mirë që Serbia të gjente një zgjidhje për çështjen e Kosovës. Edhe Kosovës i duhet një zgjidhje", nënvizoi Llanski.

I pyetur për presionin e vazhdueshëm ndaj Serbisë, ndër të tjera përmes Parlamentit Evropian dhe një deputeti austriak si Andreas Shider, ai deklaroi se "tensionet gjeopolitike kanë ndryshuar në mënyrë drastike", dhe se një vend që ka një pozicion të balancuar bëhet objektiv presioni.

"Serbia ka marrë një qëndrim që unë e mirëpres. Ne kemi nevojë për vende që kanë një pozicion të balancuar me të cilin është i mundur dialogu. Ky pozicion neutral mundëson bisedime me të gjitha palët. Megjithatë, kjo është arsyeja pse presioni ndaj Serbisë po rritet. Por, pavarësisht presioneve, Serbia arrin t'i lërë të gjitha dyert të hapura”, tha Llanski, duke përmendur si shembull marrëdhëniet e rëndësishme që Serbia mban me Kinën.

Serbia ka funksionin e “ndërtuesit të urave” në Evropë, shtoi Llanski.