Maliqi: Në Bruksel shumë gjëra janë zgjidhur "në letër", por jemi në "pikë të vdekur"

Analisti politik Shkëlzen Maliqi ka vlerësuar se „në letër“ shumë gjëra nga marrëveshjet mes Beogradit dhe Prishtinës në Bruksel më 2015 janë zgjidhur, por çështja e formimit të BKS-së, si edhe disa çështje të tjera, vazhdojnë të mbeten në „pikë të vdekur“.

Duke komentuar marrëveshjen ku janë dakorduar liria e lëvizjes në urën kryesore mbi Ibër, çështjet e energjisë dhe të telekomunikacionit, por edhe ajo kryesorja – formimi i Bashkësisë, Maliqi mendon se kjo çështje që nga fillimi ka qenë e lidhur me „zgjidhjen përfundimtare të çështjes së Kosovës“.

„Ajo gjithmonë në një mënyrë ka qenë e kushtëzuar që të arrihet një marrëveshje e plotë. Gjatë dhjetë viteve të fundit, të dyja palët, sa herë që kanë mundur, e kanë penguar pjesërisht ose tërësisht marrëveshjen. Dhe BKS ka mbetur aty, që duhet të kalojë nëpër filtrin e Gjykatës Kushtetuese. Një herë në thelb ka kaluar, por pati disa vërejtje dhe që atëherë gjithçka ka ngecur“, ka deklaruar Maliqi për Kosovo online.

Ai beson se një nga arsyet pse kjo marrëveshje nuk ka marrë jetë deri në fund është edhe fakti që ndërkohë „janë zhvilluar shumë gjëra jashtë marrëdhënieve Kosovë-Serbi“.

„Në njëfarë mënyre, ‘në letër’ shumë gjëra janë zgjidhur edhe më pas. Ajo është baza e të gjitha marrëveshjeve të mëvonshme, aty është edhe marrëveshja e Ohrit, edhe marrëveshja franko-gjermane. Gjithçka është aty, në letër“, ka theksuar ai.

Ai thotë se nga ajo që ishte dakorduar në vitin 2015, ura kryesore mbi Ibër „ka mbetur aty ku është“.

„Mund të kalojnë këmbësorët, por jo makinat. Dhe tani po bëhen ‘lojëra’ rreth asaj nëse Kurti do të ndërtojë disa ura pontone para zgjedhjeve, për të treguar se politika e tij ka qenë e drejtë. Megjithatë, ai nuk mund ta bëjë këtë, sepse urën e ruajnë NATO dhe KFOR. Dhe tani jemi këtu, në një ‘pikë të vdekur’“, ka thënë Maliqi.

Ai shton se formimi i BKS-së do të ndodhë vetëm kur të arrihet marrëveshja për normalizimin e marrëdhënieve, e serbët të kthehen në institucionet e Kosovës.

„Kjo çështje është gjithmonë e gjallë, por të dyja palët duhet të pranojnë ato kushte që janë më pak a më shumë të dakorduara. Nuk kam pasur mundësi ta shoh marrëveshjen e fundit. Meqenëse duhet të hyjë në fuqi, kjo nënkupton që serbët të kthehen në institucionet e Kosovës, të pranojnë sovranitetin e Kosovës dhe pastaj të kenë të gjitha ato të drejta që u janë garantuar“, ka thënë ai.

I pyetur se si duhet interpretuar deklarata e ambasadorit gjerman në Prishtinë, Jorn Rode, se Kosova nuk mund të bëhet anëtare e Këshillit të Evropës për shkak se nuk ka dorëzuar Statutin e BKS-së në Gjykatën Kushtetuese, Maliqi është pajtuar.

„As projektstatutin nuk e ka dërguar, që është hapi i parë. Një herë është bërë kjo, dhe Gjykata Kushtetuese nuk e ka ndaluar, por ka thënë që 23 pika duhet të formulohen qartë, në mënyrë që të mos ketë shmangie e interpretime të ndryshme. Por siç po shohim tani se si shmangen rreth Kushtetutës së Kosovës, të gjithë kanë pretendimet dhe dëshirat e tyre, e askush nuk lexon çfarë shkruan në Kushtetutë. Kjo duhet të zgjidhet. Para më shumë se një viti, qeveria jonë kishte mundësi ta dërgonte projektstatutin e BKS-së në Gjykatën Kushtetuese dhe nuk e bëri, dhe ky ishte kusht për pranimin në Këshillin e Evropës. Ja, ende është e njëjta situatë“, ka përfunduar Maliqi.