MPJ e Serbisë: Deklaratat nga Mali i Zi nuk kontribuojnë në stabilitetin e rajonit

Ministria e Punëve të Jashtme të Republikës së Serbisë ka shprehur shqetësimin lidhur me deklaratat që vijnë nga Mali i Zi, në kontekstin e mbështetjes për pavarësinë e Kosovës dhe lobimit aktiv për anëtarësimin e Prishtinës në organizatat ndërkombëtare, gjë që, siç vlerësohet, është në kundërshtim me të drejtën ndërkombëtare dhe Kartën e Kombeve të Bashkuara, por edhe me marrëdhëniet e mira fqinjësore.

Lidhur me deklaratën e ministrit të punëve të jashtme të Malit të Zi, Ervin Ibrahimoviq, se mbështetja për Kosovën në Këshillin e Evropës është prioritet i atij shteti, Ministria e Punëve të Jashtme e Serbisë thekson se asnjë prioritet nuk duhet të jetë i drejtuar kundër interesave jetike të shteteve të tjera.

"Serbia nuk ndërhyn në prioritetet e politikës së jashtme të asnjë shteti tjetër sovran, por mendojmë se asnjë prioritet nuk duhet të jetë i drejtuar kundër interesave jetike të shteteve dhe popujve të tjerë. Kjo është veçanërisht e rrezikshme nëse vjen nga shtetet fqinje. Dhe deklarata të tilla, pa dyshim, përkeqësojnë më tej tensionet rajonale dhe nuk kontribuojnë në stabilitetin në këtë pjesë të Ballkanit", thuhet në njoftim.

Shtohet se Serbia është e përkushtuar për ruajtjen e paqes dhe stabilitetit dhe beson se dialogu është mënyra e vetme për zgjidhjen e çështjeve të hapura.

"U bëjmë thirrje të gjithë fqinjëve tanë, përfshirë Malin e Zi, të përmbahen nga deklaratat dhe veprimet që mund të shkaktojnë përshkallëzim të tensioneve dhe të punojnë për forcimin e besimit dhe bashkëpunimit të ndërsjellë. Duke marrë parasysh lidhjet historike dhe kulturore që Serbia ka me rajonin, besojmë se është thelbësore të punohet për ruajtjen e marrëdhënieve pozitive, në vend të mbështetjes së veprimeve antisërbe, ndarjeve të mëtejshme dhe konflikteve. Shpresojmë që të gjithë aktorët politikë në rajon do të përqendrohen me përgjegjësi në ndërtimin e një të ardhmeje të qëndrueshme për të gjithë qytetarët e Ballkanit", thuhet në njoftim.