Nikovski: Pakti Trepalësh nga Tirana është fragmentim i rajonit, çon drejt konfontimeve

Ish-ambasadori maqedonas dhe analisti Risto Nikovski vlerësoi se marrëveshjet e fundit të nënshkruara për bashkëpunim ushtarak ndërmjet disa vendeve të Ballkanit Perëndimor përfaqësojnë një fragmentim të mëtejshëm të rajonit dhe çojnë drejt konfrontimeve të reja.

“Absolutisht, kjo është një ndarje e re dhe këto janë konfrontime të reja. Sipas bindjes sime të thellë, krejtësisht të panevojshme, sepse na kishte gëzuar fakti që pothuajse të gjitha vendet nga Ballkani – si ato që janë tashmë anëtare të unionit, ashtu edhe këto gjashtë që nuk janë – kishin një orientim euroatlantik të përbashkët, gjë që për herë të parë në histori i kishte vendosur të gjitha në të njëjtën linjë. Megjithatë, politika e gabuar e Brukselit, e cila i la këto gjashtë vende kandidate në baltë, duke i mbajtur për shumë gjatë në dhomën e pritjes, të gjitha këto politika të gabuara të Brukselit janë në thelb çelësi i këtyre ndarjeve të reja, i këtyre përplasjeve të reja, dhe në fund të ditës, Brukseli do ta paguajë përsëri çmimin”, deklaroi Nikovski.

Ai beson se marrëveshjet ushtarake të nënshkruara së fundmi, fillimisht ndërmjet Shqipërisë, Kroacisë dhe Kosovës, e më pas Serbisë dhe Hungarisë, nuk janë "absolutisht rastësi" dhe se ka një "sfond" që nuk është i qartë për momentin.

Por një shenjë e qartë se ka hyrë në një “proces militarizimi” shpjegohet jo vetëm me vendimin e SHBA-së që anëtarët e NATO-s të ndajnë pesë për qind të PBB-së së tyre në të ardhmen, por edhe me synimin e BE-së për të ndarë qindra milionë euro për industrinë ushtarake.

Ai e konsideron shqetësuese marrëveshjen ushtarake mes Shqipërisë, Kroacisë dhe Kosovës.

"Kjo duhet të na shqetësojë ne në rajon. E dini, kur dy shtete nënshkruajnë marrëveshje për bashkëpunim në mbrojtje, është një gjë normale. Por kur tre vende janë tashmë në tryezë, tashmë është një pakt, dhe tregon një lloj rigrupimi që sigurisht nuk është i rastësishëm dhe sigurisht ka disa qëllime dhe synime të veçanta", thekson Nikovski.

Ai shprehet i bindur se ky është një fragmentim i ri i rajonit, pavarësisht se nuk është e qartë nëse marrëveshja në fushën e bashkëpunimit ushtarak ndërmjet Serbisë dhe Hungarisë është pasojë e marrëveshjes trepalëshe ndërmjet Shqipërisë, Kroacisë dhe Kosovës.

"Sidoqoftë, është një fragmentim i ri i rajonit dhe në situatën e dhënë, pasi Maqedonia dhe Mali i Zi tashmë janë pjesë e NATO-s dhe disi të mbuluara nga ai këndvështrim, ka mbetur vetëm Bosnja dhe Hercegovina. Të gjitha këto lëvizje të fundit duhet të quhen mbrojtëse dhe ju e dini se mbrojtja shpesh zbret edhe në agresion edhe në sulm. Këto marrëveshje po çojnë në mënyrë shqetësuese në ndarje të mëtejshme në rajon”, thotë ish-ambasadori maqedonas.

Ai është i bindur se konflikti kryesor është ndërmjet Kroacisë dhe Serbisë, por se “taktikat” e Kosovës janë shqetësuese.

“Konflikti do të jetë kryesisht ndërmjet Kroacisë dhe Serbisë, sepse është armiqësi e thjeshtë dhe përgjithësisht ky pakt trepalësh apo de facto mund të drejtohet vetëm kundër Serbisë. E dini, çështja e Kosovës mbetet e padefinuar, këtu ka stagnim të plotë, nuk ka përparim, dhe baza është mosgatishmëria e Kosovës për të përmbushur obligimet e saj dhe për të kërkuar zgjidhje me Serbinë. Kurti e bën politikën e tij, duke kundërshtuar dhe konfrontuar shpeshherë SHBA-në, e cila është mentori i tij. Sa është taktikë, sa është thelbi, nuk mund të jeni kurrë i sigurt, por gjithsesi ka zhvillime shqetësuese, ndarje të reja në rajon që sigurisht nuk do të na sjellin asgjë të mirë”, saktëson Nikovski.

Ai thotë se marrëveshjet e nënshkruara ushtarake janë pjesë e një strategjie që ai beson se e ka origjinën nga Kroacia.

"Në këtë rast konkret, baza është sigurisht vendore dhe rajonale. Mendoj se rrënja kryesore e asaj nisme është përballja kroate me Serbinë, e cila është thelluar kohëve të fundit. Të gjithë ishim dëshmitarë të zgjedhjeve të fundit në Kroaci, Serbia ishte 'djalli kryesor'. Kjo është vetëm një aleancë apo pakt i ri për të sfiduar Serbinë në një farë mënyre, për ta vënë atë nën një lloj kufizimi," beson Nikovski.

Ai rikujton se armatimi është i theksuar në Ballkanin Perëndimor dhe se Kroacia dhe Serbia janë në krye me blerjen e avionëve të rinj ushtarakë, por se një trend i tillë do të prekë edhe vendet si Maqedonia e Veriut që nuk kanë planifikuar të armatosen shtesë.

"Do të na detyrojë të gjithëve në një mënyrë ose në një tjetër, veçanërisht nëse NATO insiston që pesë për qind e prodhimit të brendshëm bruto të ndahen për produktin e mbrojtjes. Do të jetë shkatërruese për Maqedoninë. Dhe jo vetëm për Maqedoninë, por edhe për shumë anëtarë të Unionit. Pra, ne po përballemi me kohë serioze, kohë të rrezikshme që do të shohim se çfarë do të sjellin. Në çdo rast tendencat nuk janë pozitive”, paralajmëron Nikovski.