Ombudsmani nisi hetim lidhur me pretendimet për keqtrajtimin e të arrestuarve në Gazimestan

Institucioni i Ombudsmanit njoftoi se Ombudsmani Naim Qelaj, bazuar në ankesat e pranuara nga disa qytetarë, informacionet e dorëzuara nga organizata të ndryshme joqeveritare, si dhe pretendimet e publikuara në media, ka nisur një hetim sipas detyrës zyrtare lidhur me pretendimet se personat e arrestuar gjatë shënimit të Vidovdanit në Gazimestan më 28 qershor janë keqtrajtuar nga pjesëtarët e Policisë së Kosovës.

Siç thuhet në njoftim, Institucioni i Ombudsmanit ka hapur hetim lidhur me pretendimet dhe ankesat e disa qytetarëve të arrestuar nga Policia e Kosovës, të cilët pohojnë se gjatë transportimit në stacionin policor janë ekspozuar ndaj dhunës fizike dhe psikike, si dhe se u janë shkelur të drejta të tjera të garantuara me Kushtetutë dhe ligjet në fuqi.

Shtohet se hetimi është iniciuar me qëllim të përcaktimit të fakteve dhe rrethanave të rastit, si dhe të vlerësimit nëse trajtimi ndaj personave të arrestuar ka qenë në përputhje me standardet kushtetuese, ligjore dhe ndërkombëtare për mbrojtjen e të drejtave dhe lirive themelore të njeriut.

“Institucioni i Ombudsmanit rithekson se çdo person i privuar nga liria duhet të trajtohet me dinjitet dhe në përputhje me parimin e ndalimit absolut të keqtrajtimit fizik, trajtimit ose ndëshkimit çnjerëzor apo poshtërues. Çdo pretendim për përdorim të tepruar të forcës ose shkelje të të drejtave të personave të privuar nga liria kërkon një hetim të pavarur, të paanshëm, efektiv dhe të shpejtë”, thuhet në njoftim.

Nga Institucioni i Ombudsmanit theksojnë se në kuadër të hetimit do të ndërmerren të gjitha veprimet e nevojshme, përfshirë mbledhjen e informacioneve dhe dokumentacionit përkatës nga organet kompetente, në përputhje me mandatin kushtetues dhe ligjor të këtij institucioni.

Pas përfundimit të hetimit, siç thuhet, Institucioni i Ombudsmanit do ta informojë publikun dhe palët e interesuara për gjetjet dhe rekomandimet, në përputhje me kompetencat e tij ligjore.

Një grup prej pesë organizatash të shoqërisë civile kishte paraqitur më herët një ankesë zyrtare pranë Ombudsmanit për, siç kanë deklaruar, veprimet sistematike të paligjshme dhe të parregullta të Policisë së Kosovës.

Zëvendësombudsmani Sërgjan Sentiq deklaroi për Kosovo online se hetimi paraprak ka treguar se ekzistojnë baza për hapjen formale të rastit dhe zhvillimin e një hetimi gjithëpërfshirës.

Lidhur me ndalimin e serbëve pas shënimit të Vidovdanit reagoi edhe Mbrojtësi i Qytetarëve i Serbisë, Zoran Pashaliq, i cili i kërkoi ombudsmanit të Kosovës, Naim Qelaj, që urgjentisht t’i shqyrtojë të gjitha rrethanat e rastit. Për këtë ai ka njoftuar edhe institucionet e Bashkimit Evropian, ambasadat e vendeve të Quint-it dhe Misionin e OSBE-së në Prishtinë.