OSBE: Me shqetësim po ndjekim aksionet në Mitrovicën e Veriut, Shtërpcë dhe Zubin Potok

Misioni i OSBE-së në Kosovë po i ndjek me shqetësim aksionet e fundit në Shtërpcë, Mitrovicën e Veriut dhe Zubin Potok, përfshirë masat e ndërmarra ndaj ndërmarrjeve komunale, ujësjellësit, si dhe mbylljen e palestrës sportive në Mitrovicën e Veriut.

“Mbyllja e institucioneve të tilla pa alternativa të qëndrueshme, përfshirjen e komunitetit apo vazhdimësi të përshtatshme institucionale rrezikon të ndikojë ndjeshëm në qasjen e komuniteteve pakicë ndaj shërbimeve themelore”, thuhet në postimin e OSBE-së në rrjetin social "X".

Misioni thekson se çështje të tilla duhet të zgjidhen përmes një angazhimi konstruktiv dhe mbështet thirrjet për zgjidhje brenda dialogut të ndërmjetësuar nga BE.

“Lidhur me këto zhvillime, Misioni është gjithnjë e më i shqetësuar për deklaratat nxitëse në rrjetet sociale, veçanërisht ato ekstreme në Telegram. Kjo retorikë përçarëse vetëm sa kontribuon në përshkallëzimin e tensioneve. Komunikimi i përgjegjshëm mbetet thelbësor për uljen e përplasjeve dhe ndërtimin e besimit ndërmjet komuniteteve,” shton OSBE.