Pavkoviq: Lufta për postin e kryeministrit që në fillim e vështirëson koalicionin e opozitës së Kosovës

Bashkëpunëtori i Qendrës për Politikat Evropiane nga Beogradi, Millosh Pavkoviq, vlerësoi se lufta për postin e kryeministrit do të ishte pika kyçe e përplasjes në një koalicion të mundshëm të opozitës për formimin e qeverisë së re të Kosovës.

“Kjo është çështje e marrëdhënieve të tyre të ndërsjella, e liderëve të këtyre tri partive, dhe nëse do të hapej çështja se kush do të ishte kryeministër. Kjo është një pikë që mund të shkatërrojë negociatat që në fillim, për shkak se si PDK-ja ashtu edhe LDK-ja kanë ambicie për të marrë postin e kryeministrit, gjë që e vështirëson çdo marrëveshje koalicioni. Nëse do ta vënë mbi gjithçka interesin për të rrëzuar Kurtin dhe Vetëvendosjen, apo do të dominojnë ambiciet personale, kjo mbetet të shihet, por nëse ambiciet personale do të jenë në plan të parë, atëherë vështirë që opozita do të arrijë të formojë qeveri”, deklaroi Pavkoviq për Kosovo online.

Ai shpjegon se Lëvizja Vetëvendosje, si dhe partitë opozitare, mund të arrijnë shumicën në Kuvend me ndihmën e komuniteteve minoritare, por pavarësisht nëse do të kenë sukses në këtë, qeveria që do të dalë nga një koalicion i tillë do të ishte "e prirur për t'u rrëzuar".

"Matematika është e qartë. Vetëvendosja ka 48 mandate, tre partitë më të mëdha opozitare, PDK, LDK dhe AAK-Nisma kanë 54 së bashku. Prandaj, atyre u duhet ai numër 'magjik' prej 61. Një mundësi është në fakt të tërheqin dhjetë vota të pakicave, por jo nga Lista Serbe, por 10 vota të pakicave nga pakicat e tjera kombëtare, pra boshnjakët, romët, ashkalinjtë dhe egjiptianët. Me ato 10 vota, opozita, në teori, mund të mbledhë 64 vota, domethënë 64 mandate në parlament pa Listën Serbe", thotë Pavkoviq për Kosovo online.

Megjithatë, ai thekson se "shifrat dhe statistikat" janë një gjë, dhe realiteti është krejt tjetër.

"Kemi parë se është e vështirë për Kurtin të fitojë votat e pakicave, dhe do të jetë edhe më e vështirë për opozitën, sepse tashmë është një koalicion prej tre ose katër partish, plus partitë e pakicave kombëtare. Dhe kjo sigurisht do të ishte një qeveri shumë e paqëndrueshme, siç do të ishte një qeveri e Kurtit me pakica. Në teorinë politike, kjo do të ishte një 'qeveri minimale' me 61, 62 ose 63 vota që do të ishte e prirur për rrëzim të lehtë", tha Pavkoviq.

Sfida e parë për një qeveri të tillë, pavarësisht se kush e formon atë, do të jetë zgjedhja e ardhshme e presidentit të Kosovës në parlament.

"Ato zgjedhje po vijnë në fillim të vitit 2026 dhe do të jetë një provë serioze për këdo që formon qeverinë", është i bindur Pavkoviq.