Stojanoviq: Situata është përkeqësuar, serbët në Kosovë janë të ekspozuar ndaj dhunës fizike, institucionale dhe politike

Delegacioni i Serbisë, i kryesuar nga Sekretari Shtetëror i Ministrisë së Punëve të Jashtme, Nikolla Stojanoviq, mori pjesë në Këshillin e 31-të Ministror të OSBE në Maltë. Stojanoviq paralajmëroi përkeqësimin e situatës në Kosovë, ku serbët janë të ekspozuar ndaj dhunës fizike, institucionale dhe politike dhe i hodhi poshtë si të pabaza akuzat e fundit nga Prishtina ndaj Beogradit.

Këshilli Ministror i OSBE mblodhi përfaqësues të nivelit të lartë të shteteve anëtare për të diskutuar sfidat dhe zgjidhjet në fushën e sigurisë, bashkëpunimit dhe dialogut.

Stojanoviq theksoi rëndësinë e OSBE si një platformë e bazuar në konsensus dhe dialog, e cila ofron një qasje unike ndaj sigurisë gjithëpërfshirëse përmes dimensioneve politike, ekonomike dhe njerëzore.

Ai theksoi veçanërisht parimet e Aktit Final të Helsinkit, si shtylla bazë të rendit ndërkombëtar, duke përfshirë respektimin e integritetit dhe sovranitetit territorial, zgjidhjen paqësore të mosmarrëveshjeve dhe mosndërhyrjen në punët e brendshme të shteteve, njoftoi Ministria e Punëve të Jashtme të Serbisë.

Stojanoviq vuri në dukje shkeljen e këtyre parimeve në rastin e Kosovës, duke theksuar se shpallja e njëanshme e pavarësisë së krahinës paraqet shkelje të rëndë të së drejtës ndërkombëtare.

Në fjalën e tij ai paralajmëroi përkeqësimin e situatës në Kosovë, ku serbët janë të ekspozuar ndaj dhunës fizike, institucionale dhe politike.

Ai i dënoi si shkatërruese masat e njëanshme të Prishtinës, të cilat krijuan një situatë të paqëndrueshme dhe i bëri thirrje bashkësisë ndërkombëtare që të sigurojë zbatimin e të gjitha marrëveshjeve të arritura më parë, duke përfshirë edhe formimin e Bashkësisë së Komunave Serbe.

Stojanoviq gjithashtu hodhi poshtë akuzat e fundit të pabaza kundër Beogradit si një përpjekje për të larguar vëmendjen nga problemet reale dhe shkeljet e të drejtave të njeriut në Kosovë.

Duke folur për prioritetet e politikës së jashtme të Serbisë, Stojanoviq theksoi se qëllimi strategjik i Serbisë është anëtarësimi në Bashkimin Evropian.

Ai theksoi përkushtimin e Serbisë ndaj multilateralizmit dhe parimeve të Kartës së Kombeve të Bashkuara, të cilat paraqesin bazën për paqen, stabilitetin dhe bashkëpunimin në rajon dhe më gjerë.

Në margjinat e këshillit, Stojanoviç, në një sërë takimesh dypalëshe, foli me ushtruesin e detyrës së Sekretarit të Shtetit të Mongolisë, Munkhtushig Lhanaazhav, Drejtoreshën për OKB-në, Organizatat Ndërkombëtare dhe të Drejtat e Njeriut të Ministrisë së Punëve të Jashtme të Lituanisë, Ramsa Ramoshkaite, zëvendësministren e Punëve të Jashtme të Estonisë, Minna-Lina Lind, dhe Zëvendësministren e Punëve të Jashtme të Tajlandës, Rus Xhaliandra.

Gjatë takimeve u diskutuan mundësitë për përmirësimin e bashkëpunimit dypalësh dhe shumëpalësh.