Pavkoviq: Nuk besoj se Vetëvendosja do të ishte e gatshme t'ua dorëzonte të gjitha ministritë ekspertëve

Drejtori i Strategjisë në Qendrën për Politika Evropiane nga Beogradi, Millosh Pavkoviq, thotë se një qeveri ekspertësh pa figura politike të udhëhequr nga mandatari i propozuar Glauk Konjufca mund të jetë një rrugëdalje nga kriza politike, por se ka pak shanse që kjo të ndodhë.

pozicionet ministrore ekspertëve.

"Më duket se në këtë moment është absolutisht e pamundur, veçanërisht duke pasur parasysh egon dhe vetëbesimin e Albin Kurtit. Së dyti, nuk më duket se opozita është e gatshme të mbështesë një qeveri të tillë. Besoj se gjithmonë do të kishte disa dyshime - kush do t'i zgjidhte ekspertët, kush do të vlerësonte nëse dikush është ekspert apo jo, si të harmonizohej lista e ministrave... Ka shumë hapësirë për mosmarrëveshje midis partive opozitare dhe Vetëvendosjes", thotë Pavkoviq për Kosovo online.

Siç shton ai, nëse merret parasysh se partitë opozitare nuk mundën të arrinin një marrëveshje për formimin e qeverisë edhe pse i kanë numrat e nevojshëm në letër, atëherë shanset që ato të votojnë për një qeveri ekspertësh janë edhe më të vogla.

Qeveritë eksperte, thekson bashkëbiseduesi ynë, janë të mundshme në teori, por rrallë ndodhin në praktikë.

"Edhe kur të ndodhë, do të jetë një lloj pi-ar, dhe në thelb, rrallë ndonjë qeveri do të jetë vërtet eksperte. Kjo mund të cilësohet si një rrugëdalje nga kriza aktuale politike, të jetë një qeveri me mandat të kufizuar, por në thelb mendoj se partitë politike nuk do të ishin të gatshme të votonin për një qeveri të tillë, pavarësisht faktit se ato fshihen pas dëshirës për të dalë nga kriza", përfundon Pavkoviq.

Ish-deputeti i LDK-së dhe anëtari i Bordit të Drejtorëve të Lidhjes Qytetare Shqiptaro-Amerikane, Faton Bislimi, vlerësoi së fundmi se Glauk Konjufca ka një "mundësi historike për të provuar se shteti është mbi partinë", duke ofruar një qeveri jopartiake me njerëz profesionistë, të ndershëm dhe të provuar kombëtarisht.