Periq: Janë ruajtur shtyllat e mbijetesës së popullit serb në Kosovë dhe Metohi

Me zgjidhjen lidhur me Ligjin për të huajt janë ruajtur shtyllat e mbijetesës së popullit serb në Kosovë, deklaroi sot dekana e Fakultetit Juridik të Universitetit të Prishtinës me seli të përkohshme në Mitrovicën e Kosovës, prof. dr Sllobodanka Periq.

“Kjo zgjidhje për të gjithë ne në Universitet përfaqëson një hap dhe një mënyrë për punë të pandërprerë, dhe jo vetëm për të punësuarit në pjesën administrative, por para së gjithash për studentët. Pa këtë zgjidhje do të viheshin në pikëpyetje dhe do të rrezikoheshin sistemi arsimor dhe ai shëndetësor”, tha Periq për Kosovo online.

Ajo theksoi se kjo do të shkaktonte një efekt domino për mbijetesën e serbëve në Kosovë.

“Kjo zgjidhje jo vetëm që i ka zhvendosur, por edhe i ka hequr barrierat administrative, të cilat për të gjithë ne në këto institucione do të sillnin shumë ndërlikime administrative, procedurale, menaxheriale dhe juridike, gjë që do ta vështirësonte edhe më shumë punën tonë. Nesër ne vazhdojmë normalisht punën dhe procesin mësimor. Janë këtu obligimet para provimeve dhe vetë provimet. Për ne dhe për studentët është më e rëndësishmja që vazhdojmë të punojmë në sistemin arsimor sipas planit dhe programit mësimor të Republikës së Serbisë”, theksoi Periq.

Ajo shtoi se gjatë gjithë këtyre viteve Universiteti, me në krye Rektoratin, është i përkushtuar ndaj mbijetesës dhe luftës për ruajtjen e sistemit arsimor.

“Në këtë luftë nuk jemi vetëm, kemi mbështetje të madhe nga komuniteti ynë lokal dhe pranë nesh është shteti ynë Serbia. Nuk do të them pas nesh, por pranë nesh në këtë betejë. Duhet ta kuptojmë se Universiteti dhe sistemi shëndetësor përfaqësojnë shtyllat e mbijetesës së serbëve në Kosovë dhe Metohi. Kjo është kërthizë që na lidh neve në Kosovë dhe Metohi me atdheun tonë Serbinë”, tha Periq.

Ajo theksoi se nuk bëhet fjalë vetëm për një luftë për sistemin arsimor dhe shëndetësor, por për një luftë për çdo fëmijë.

“Çdo fëmijë që regjistrohet në shkollën fillore, pastaj në të mesmen dhe më pas në Universitet, dhe që punësohet në Kosovë dhe Metohi, për ne është edhe një familje që mbetet këtu. Me çdo familje që ruajmë, ne ruajmë sovranitetin dhe integritetin e Serbisë në Kosovë dhe Metohi”, theksoi Periq.