Petkoviq: Me hyrjen në objektin e Kryqit të Kuq, Kurti po godet themelet e mbijetesës së serbëve në Kosovë

Drejtori i Zyrës për Kosovë dhe Metohi, Petar Petkoviq, vlerësoi se me rastin e hyrjes së Policisë së Kosovës në objektin e Kryqit të Kuq të Kosovës dhe Metohisë "Dragiša Murganić", i cili ndodhet në Zubin Potok, pranë liqenit të Gazivodës, Albin Kurti po godet në themelet e mbijetesës së popullit serb në Kosovë dhe po rrezikon funksionimin e kësaj organizate të rëndësishme humanitare ndërkombëtare.

“Me këtë veprim, Kurti po godet në vetë themelet e mbijetesës së popullit serb në Kosovë dhe Metohi dhe po e rrezikon punën e kësaj organizate të rëndësishme humanitare ndërkombëtare, për çka Zyra për Kosovë dhe Metohi do të njoftojë të gjithë përfaqësuesit relevantë ndërkombëtarë”, thuhet në deklaratën e Petkoviqit.

Siç theksoi ai, bëhet fjalë për një objekt që ka shërbyer ekskluzivisht për trajnimin e fëmijëve dhe pjesëmarrësve në kurset e Kryqit të Kuq, trajnime në fushën e ndihmës së parë dhe shpëtimit, lloje të ndryshme të garave sportive, ushtrime dhe ligjërata, akomodim për turistët dhe sportistët që qëndronin në këtë pjesë të Kosovës dhe pranë liqenit të Gazivodës, si dhe për organizimin e vizitave zyrtare.

“Sot një numër i madh i pjesëtarëve të policisë kanë hyrë në objekt, ku po kryejnë bastisje, dhe portierit dhe punonjësit të sigurimit nuk u është lejuar të jenë të pranishëm gjatë kontrollit, gjë që lë shumë hapësirë për manipulim nga falangat e Kurtit. Është veçanërisht indikative që para tre ditësh disa portale shqiptare kanë shkruar gjerësisht artikuj të pabazuar dhe tendenciozë për këtë objekt, duke u përpjekur ta komprometojnë dhe në fakt të përgatisin terrenin mediatik dhe justifikimin për këtë hyrje të dhunshme dhe të paligjshme”, theksoi Petkoviq.

Ai shtoi se objektin e Kryqit të Kuq prej vitesh e kanë vizituar rregullisht pjesëtarë të misionit të KFOR-it, veçanërisht kontingjenti gjerman, për t'u njohur me punën dhe funksionimin e Kryqit të Kuq dhe për të mbajtur takime të rregullta me udhëheqësinë e kësaj organizate ndërkombëtare, dhe se asnjëherë nuk ka pasur ndonjë çështje kontestuese në lidhje me këtë objekt – përveç qëllimit të Kurtit për ta uzurpuar atë me forcë.