Petkoviq me Powell: Kurti çdo ditë shkakton kriza dhe tensione në Kosovë

Drejtori i Zyrës për Kosovë dhe Metohi, Petar Petkoviq, u takua sot me këshilltarin për siguri kombëtare të Qeverisë së Mbretërisë së Bashkuar të Britanisë së Madhe dhe Irlandës së Veriut, Jonathan Powell, të cilin e njoftoi me situatën politike dhe të sigurisë në Kosovë si dhe me dialogun ndërmjet Beogradit dhe Prishtinës që zhvillohet në Bruksel.

Petkoviq përcolli se Beogradi është i përkushtuar ndaj normalizimit të marrëdhënieve përmes dialogut me Prishtinën, gjë që është dëshmuar edhe përmes angazhimit aktiv në zbatimin e Deklaratës për personat e zhdukur, por se Prishtina shkatërron çdo mundësi marrëveshjeje dhe që prej 12 vitesh refuzon të formojë Asociacionin e Komunave Serbe megjithëse është zotuar për këtë edhe në parlamentin e saj, ka njoftuar Zyra për KeM.

Petkoviq theksoi se regjimi i Albin Kurtit pothuajse çdo ditë ndërmerr hapa eskalues, kryen arrestime arbitrare dhe politikisht të motivuara të serbëve, shkakton kriza dhe tensione, duke synuar drejtpërdrejt krijimin e kushteve të pamundura për jetën e popullit serb, ndryshimin e strukturës etnike në Kosovë dhe destabilizimin e tërë hapësirës së Ballkanit Perëndimor me politikë të papërgjegjshme.

“Beogradi, nën udhëheqjen e presidentit Aleksandar Vuçiq, do të vazhdojë të ruajë paqen dhe stabilitetin dhe përmes dialogut do të synojë zgjidhje kompromisi që kanë për qëllim përmirësimin e jetës së njerëzve në Kosovë dhe Metohi”, tha drejtori i Zyrës për KeM.

Në takim ishte i pranishëm edhe ambasadori i Mbretërisë së Bashkuar të Britanisë së Madhe dhe Irlandës së Veriut në Serbi, Edward Ferguson.