Petriç: Prishtina duhet t’u ofrojë serbëve kompetenca konkrete kulturore, gjuhësore dhe administrative

​​​​​​​Ish-diplomati austriak Volfgang Petriç vlerëson se bllokada e dialogut të ndërmjetësuar nga BE-ja ka pasoja më të drejtpërdrejta për Kosovën sesa për Serbinë, duke theksuar se hapi i parë duhet të vijë nga Prishtina, e cila duhet t’u ofrojë serbëve kompetenca konkrete kulturore, gjuhësore dhe administrative, në përputhje me Marrëveshjen e Brukselit, transmeton Radio Evropa e Lirë.

Petriç vlerëson se për shkak të bllokimit të procesit të Brukselit, Kosova po paguan çmim në aspektin e sigurisë, stabilitetit dhe orientimit drejt së ardhmes, ndërsa politika mbetet kryesisht e brendshme dhe e pamjaftueshme e përshtatur me kontekstin më të gjerë evropian dhe gjeopolitik.

“Sa herë që jam në Prishtinë ose flas me njerëz atje, krijoj përshtypjen se ekziston vetëm Kosova dhe asgjë tjetër. Ky është një qasje plotësisht e gabuar. Kurti ka cilësi të dukshme, por nëse nuk e kupton se duhet të veprojë si pjesë e një ekipi, si në planin e brendshëm ashtu edhe në atë evropian, gjërat nuk do të shkojnë mirë për zhvillimin e Kosovës”, ka thënë Petriç për REL.

Ai thekson se hapi i parë duhet të vijë nga Prishtina, e cila duhet t’u ofrojë serbëve kompetenca konkrete kulturore, gjuhësore dhe administrative, në përputhje me Marrëveshjen e Brukselit.

Sipas tij, kjo do të sinjalizonte një qasje të re bashkëpunuese dhe do të krijonte mundësinë për një marrëdhënie reale me përfaqësuesit serbë. Edhe nëse Serbia do ta kundërshtonte këtë, ajo do të paraqitej si bllokuese e procesit.

Petriç thekson se garancitë e Brukselit në këtë drejtim janë të domosdoshme.

“Që nga fillimi ka qenë e qartë se evropianët nuk do të lejojnë krijimin e një Republike tjetër Sërpska. Ne kemi paguar një çmim të lartë për këtë në Bosnje dhe Hercegovinë dhe nuk duam që kjo të përsëritet në Kosovë. Pra, është e qartë se ekzistojnë çështje kulturore, gjuhësore dhe administrative që duhet të zgjidhen”, konsideron Petriç.

Në një botë gjithnjë e më të paqëndrueshme, shtetet e vogla dhe politikisht të brishta janë “të parat që bien” kur shpërthejnë krizat, ka thënë Petriç.

Me pasiguritë rreth rolit të NATO-s dhe të ardhmes së angazhimit amerikan, Petriç paralajmëron se Kosova “nuk mund t’ia lejojë vetes status quo-në”.

Sipas tij, përparimi në zbatimin e Marrëveshjes së Brukselit nuk është vetëm një detaj teknik, por një kusht thelbësor për stabilizimin e vetë ekzistencës së Kosovës.

“Kosova në vitin 1999 ishte i vetmi vend në histori që u çlirua nga një aleancë që ishte armatosur. Dhe kjo, sipas mendimit tim, i vendos një përgjegjësi të veçantë: të veprojë me mençuri, të bashkëpunojë, të bëjë atë që është e nevojshme dhe të shkojë një hap më tej për t’u bërë pjesë e familjes së shteteve evropiane”, ka thënë Petriç.