Radojeviq mbuloi emërtimet e rrugëve, Policia e Kosovës hoqi pëlhurën: Vendosja e tabelave është në kundërshtim me vendimin e Kuvendit Komunal të Mitrovicës së Veriut

Pasi autoritetet e Kosovës vendosën tabela me emërtimet e reja të rrugëve në Mitrovicën e Veriut, kryetari i komunës, Millan Radojeviq, i mbuloi ato me një pëlhurë, duke deklaruar se vendimi për emërtimin e rrugëve është i paligjshëm.

Pak më vonë, në vendngjarje mbërritën pjesëtarë të Policisë së Kosovës, njëri prej të cilëve e hoqi pëlhurën, ndërsa Radojeviqi përpiqej të theksonte se vendimi është i paligjshëm.

“Edhe sot patëm një akt tjetër propagandistik të Lëvizjes Vetëvendosje. Siç mund ta shihni vetë, tabelat janë vendosur në mënyrë të paligjshme, joligjore dhe në kundërshtim me vendimin e Kuvendit Komunal të Mitrovicës së Veriut. Siç dihet gjerësisht, Kuvendi Komunal i Mitrovicës së Veriut më 30 janar miratoi një vendim me të cilin shfuqizoi aktin paraprak për riemërtimin e rrugëve, sepse ai ishte miratuar në kundërshtim me ligjin, pasi nuk ishte zhvilluar debat publik, nuk kishte komision multietnik dhe asnjë serb nuk kishte marrë pjesë në punën e atij komisioni. Prandaj, ato vendime ishin plotësisht të kundërligjshme dhe të paligjshme”, theksoi ai.

Sipas Radojeviqit, Ministria e Administrimit të Pushtetit Lokal ka dërguar një shkresë ku thuhet se i gjithë rasti është dërguar në gjykatë si çështje kontestuese.

“Vendosja e këtyre tabelave është në kundërshtim me ligjin dhe me institucionet lokale. Duhet të theksoj edhe një herë se Komuna e Mitrovicës së Veriut nuk është njoftuar për këtë veprim, nuk ka pasur asnjë koordinim apo konsultim. Gjithashtu, nuk është nënshkruar asnjë memorandum me nivelin qendror lidhur me riemërtimin e rrugëve në Komunën e Mitrovicës së Veriut”, shtoi Radojeviq.

Ai u bëri thirrje institucioneve qendrore, dhe veçanërisht përfaqësuesve të bashkësisë ndërkombëtare, që të mbështesin respektimin e ligjit dhe të ligjshmërisë.

“Nëse një çështje ndodhet para gjykatës dhe është objekt kontesti, duhet të pritet vendimi i gjykatës dhe vetëm më pas të merren vendime. Ajo që ndodhi sot ishte një akt i pastër propagandistik në kuadër të fushatës së Lëvizjes Vetëvendosje, në kundërshtim me interesat e qytetarëve të Mitrovicës së Veriut, të cilët në zgjedhjet lokale treguan qartë se çfarë dëshirojnë dhe çfarë mendojnë për vendimet e paligjshme të marra nga udhëheqja e mëparshme”, tha Radojeviq.

Ai theksoi se Komuna e Mitrovicës së Veriut respekton ligjet, ndërsa niveli qendror nuk po e bën një gjë të tillë.

“Komuna e Mitrovicës së Veriut do t’u drejtohet institucioneve kompetente për të mbrojtur ligjshmërinë dhe, nëse çështja është para gjykatës dhe objekt kontesti, të mos ndërmerren hapa derisa procesi të përfundojë. Ekziston një vendim i Kuvendit Komunal që është ligjor dhe legjitim dhe ne do t’i përmbahemi atij. Gjithashtu do t’i informojmë të gjithë partnerët ndërkombëtarë për këtë çështje dhe do ta ndajmë me ta këtë vendim, ashtu siç e kam ndarë edhe me ju. Presim që edhe bashkësia ndërkombëtare të reagojë”, përfundoi ai.

Ministrja në detyrë e Planifikimit Hapësinor, Fitore Pacolli, deklaroi se 88 rrugë në Mitrovicën e Veriut kanë marrë emra të rinj dhe se emërtimet e reja janë zgjedhur në bashkëpunim me administratën e mëparshme të Mitrovicës së Veriut.

Më 25 gusht 2025, Kuvendi Komunal i atëhershëm i Mitrovicës së Veriut miratoi një vendim për riemërtimin e 87 rrugëve, duke zëvendësuar emërtimet serbe me emra në gjuhën shqipe. Ndër rrugët që morën emra të rinj ishin edhe disa nga rrugët kryesore.

Pas zgjedhjeve lokale të tetorit dhe pas marrjes së detyrës nga pushteti i ri komunal, Kuvendi Komunal i Mitrovicës së Veriut më 30 janar të këtij viti miratoi një vendim për shfuqizimin e vendimeve të mëparshme për emërtimin e rrugëve në Mitrovicën e Veriut.