Rajiq: Turqia e sheh Kosovën si zonë të interesit të saj, duan t’i formojnë ushtrinë

Analisti Predrag Rajiq konsideron se Turqia është sponsori kryesor i Kosovës, se Ankara e sheh këtë pjesë të Evropës si zonë të interesit të saj dhe se është në ofensivë në territoret që dikur i përkisnin Perandorisë Osmane.

Sipas tij, Turqia prej vitesh ka qenë një nga sponsorët kryesorë të Kosovës.

“Po ju kujtoj, në vitin 2008, kur e ashtuquajtura Kosovë shpalli pavarësinë, Erdogan deklaroi se atë ditë ‘lindi vëllai i vogël turk’. Pra, kjo nuk është diçka e re, por vetëm një fazë e re, një kalim në një nivel më të lartë. Në bashkëpunimin midis Prishtinës dhe Ankarasë, Turqia tani po paraqitet si mbrojtësi thelbësor dhe kryesor i të ashtuquajturës Kosovë, ndryshe nga Gjermania dhe SHBA-ja, të cilat madje kanë ndërmarrë disa hapa diplomatikë. Për shembull, kemi parë se Uashingtoni ka pezulluar dialogun strategjik me Prishtinën. Kjo tregon se ata i kanë bërë disa vërejtje Kurtit, së paku në mënyrë verbale, ndërsa nga Turqia ai nuk merr asnjë kritikë,” tha Rajiq.

Bashkëbiseduesi ynë shprehet më tej.

“Nuk kam dëgjuar që Turqia t’i ketë bërë ndonjë vërejtje Kurtit për mosformimin e Asociacionit të Komunave me Shumicë Serbe (AKS) apo që në ndonjë mënyrë tjetër të ketë treguar se nuk pajtohet me politikën e tij. Dhe unë nuk mendoj se kjo lidhet vetëm me Kurtin. Kjo është pjesë e politikës së Turqisë në Ballkan. Ata duan të formojnë të ashtuquajturën ushtri të Kosovës, dhe Turqia, si fuqi ushtarake, po sillet si shtet që e konsideron këtë pjesë të Evropës zonë të interesit të vet. Turqia ka qenë në ngritje të madhe vitet e fundit, veçanërisht pas fitores së Azerbajxhanit në Kaukazin e Jugut, ku ajo u bë faktor kyç dhe e nxori Rusinë nga loja. E njëjta po ndodh edhe në Azinë Qendrore, e për të mos folur për Lindjen e Mesme, ku pas rënies së Asadit dhe ardhjes në pushtet të forcave pro-turke, forcat që sot kontrollojnë Sirinë janë kryesisht të afërta me Turqinë. Prandaj, Turqia është në një ofensivë serioze në territoret që dikur i përkisnin Perandorisë Osmane, duke u përpjekur të bëhet faktor dominues politik, ekonomik dhe ushtarak,” konsideron ai.

Rajiq na kujton gjithashtu marrëveshjen për të ndërtuar një fabrikë në Kosovë ku, sipas planit, përveç municioneve, do të prodhohen edhe dronë.

“Vitin e kaluar ata tashmë i kanë dorëzuar dronët ‘Bayraktar’, tani po shohim se po i dërgojnë edhe dronët vetëvrasës, dhe do të prodhojnë bashkërisht edhe të tjerë. Dhe jo vetëm kaq, ata kanë dërguar edhe armë të lehta, armë antitanke, mina antipersonale e të tjera. Pra, kjo nuk është diçka e re, ata po merren me këtë prej një kohe të gjatë. Kjo është ndoshta lëvizja më e madhe deri tani, por Turqia nuk po e ndryshon qëndrimin e saj strategjik për të qenë aleati kryesor i shqiptarëve në Ballkan, në veçanti i shqiptarëve në Kosovë dhe Metohi. Ata madje kanë shprehur gatishmëri të mbushin boshllëkun që do të mbetej nëse amerikanët dhe gjermanët do të tërhiqeshin. Turqia po dërgon mesazhin se, nëse amerikanët, sidomos nën administratën e presidentit Trump, do të tërhiqeshin plotësisht, atëherë turqit do të ishin ata që do ta zëvendësonin atë rol,” shpjegoi Rajiq.

Sa i përket faktit që gjenerali turk Ulutash e ka marrë përsëri komandën e KFOR-it, Rajiq tha:

“Baza e tyre ‘Sulltan Murat’ është tashmë një nga më të rëndësishmet në rajon. Dhe vetë fakti që që nga viti 1999, kur erdhën, ata ia vunë emrin ‘Sulltan Murat’ bazës së tyre, tregon qartë se sa shumë e lidhin ata këtë me një kontekst historik dhe më të gjerë,” beson bashkëbiseduesi ynë.