Serbia dhe Hungaria mbështesin fuqimisht përpjekjet e Trump për paqe

Ministrat e Punëve të Jashtme të Serbisë dhe Hungarisë, Marko Gjuriq dhe Peter Sijarto, thanë sot se të dy vendet mbështesin fuqimisht përpjekjet e Presidentit të SHBA-së Donald Trump për t'i dhënë fund konfliktit në Ukrainë.

"Qeveritë e Serbisë dhe Hungarisë po mbrojnë paqen dhe së bashku ne qëndrojmë fort pranë përpjekjeve të Presidentit Donald Trump për paqe. Ne mbështesim zbatimin e planit të paqes, ky është një mundësi e shkëlqyer", tha Sijarto.

Hungaria beson se situata do të bëhet gjithnjë e më dramatike çdo ditë, nëse ky plan paqeje nuk miratohet, tha kreu i diplomacisë hungareze.

"Nëse ky plan nuk miratohet, çdo ditë pasuese do të çojë në një përshkallëzim dhe do të thotë humbje e më shumë jetëve njerëzore dhe vazhdimi i shkatërrimit", paralajmëroi Sijarto.

Sipas tij, lufta në Ukrainë nuk mund të zgjidhet në fushën e betejës dhe vazhdimi i saj është i pakuptimtë.

"Çmimin e asaj lufte e kemi paguar ne evropianët deri më tani. Ne nuk jemi përgjegjës për fillimin e luftës, nuk jemi përgjegjës për zgjidhjen e saj, por ne po e paguajmë çmimin. Serbët dhe hungarezët po paguajnë një çmim të lartë dhe nuk kanë të bëjnë fare me luftën. Problemet në furnizimin me energji janë pasojë e luftës në Ukrainë, në të cilën nuk do të ketë fitues. Njerëzit po humbasin jetën e tyre dhe politikanët evropianë që mbështesin luftën po bëjnë gjithçka për të minuar planin e paqes. Kjo është arsyeja pse ne që mbështesim paqen do të bëjmë gjithçka në favor të paqes. Kjo është arsyeja pse qeveritë tona, më me vendosmëri se kurrë, mbështesin përpjekjet për paqe. Ka ardhur koha që lufta të mbarojë dhe që evropianët të mos e minojnë planin e paqes dhe të mos paguajnë çmimin e një lufte me të cilën nuk kanë të bëjnë fare", tha Sijarto.

Gjuriq konfirmoi se Serbia mbështet fuqimisht iniciativën e paqes të Trump.

"Paqja në Ukrainë duhet të vijë menjëherë", tha Gjuriq. 

Ai kujtoi se Serbia priti 300,000 refugjatë dhe persona të zhvendosur nga zonat e shkatërruara nga lufta, të cilëve u hapi dyert e saj, u siguroi qasje në kujdes shëndetësor dhe arsim.

"Për të ardhmen e Evropës, e cila nuk mund t'i rezistojë këtij niveli shkatërrimi, është e nevojshme që lufta të përfundojë. Ne nuk jemi anëtare të BE-së, por i japim zërin tonë iniciativës paqësore të Presidentit të SHBA-së Donald Trump", tha Gjuriq.