Slomshek: Dialogu nuk është barrë, por mjet dhe rrugë për Serbinë dhe Kosovën drejt Bashkimit Evropian

Dialogu mbetet lart në listën e prioriteteve të BE-së dhe përfaqëson rrugën drejt integrimeve evropiane të Kosovës dhe Serbisë, tha këshilltarja politike e të dërguarit të BE-së për dialogun ndërmjet Beogradit dhe Prishtinës, Peter Sorensen, Andreja Slomshek, duke shtuar se fokusi i Brukselit është në zbatimin e Marrëveshjes së Ohrit, në de-eskalimin e qëndrueshëm të tensioneve, normalizimin ekonomik dhe agjendën humanitare.

Slomshek, në Samitin e Paqes dhe Demokracisë në Prishtinë, në kuadër të debatit “A mund të mbijetojë dialogu për normalizimin Kosovë-Serbi në një kontekst që formësohet gjithnjë e më shumë nga lufta narrative dhe paqartësia?”, tha se ky proces mbetet aktiv, duke kujtuar deklaratën e Sorensenit se bëhet fjalë për një proces të vazhdueshëm dhe jo një moment të vetëm në të cilin arrihet normalizimi.

Ajo shtoi se situata politike si në Serbi, ashtu edhe në Kosovë është shumë komplekse, por se angazhimi vazhdon, duke theksuar se Sorensen që nga fillimi i mandatit është takuar 66 herë me përfaqësuesit e Beogradit dhe të Prishtinës, gjë që, siç tha ajo, i ka mbajtur të hapura linjat e komunikimit dhe ka parandaluar tensione më të mëdha, si dhe ka siguruar që palët të mbeten të fokusuara në obligimet e lidhura me dialogun.

“Ne i shohim efektet çdo ditë, automjetet dhe mallrat kalojnë çdo ditë nëpër gjashtë pikëkalime, dhe bashkëpunimi në nivel praktik vazhdon pavarësisht tensioneve politike”, tha Slomshek.

Ajo përmendi edhe se në periudhën e fundit është bërë shumë në drejtim të de-eskalimit të situatës në veri të Kosovës.

Ajo theksoi se është me kujdes optimiste sa i përket dialogut vitin e ardhshëm, duke nënvizuar se procesi i normalizimit dhe zbatimi i Marrëveshjes së Ohrit janë kyç, ashtu edhe angazhimi i Beogradit dhe Prishtinës, që siguron një bazë të fortë për përparim, por se gjithashtu nevojiten vullnet politik dhe përmbushje e obligimeve.

Slomshek tha se fokusi i BE-së është në katër prioritete, duke përfshirë zbatimin e Marrëveshjes së Ohrit, që nënkupton takimin e parë në nivel të lartë, në të cilin ka ftuar përfaqësuesja e lartë e BE-së për politikë të jashtme dhe siguri, Kaja Kallas, gjatë vizitës së saj në Ballkanin Perëndimor.

Më tej, siç thotë, BE-ja është e fokusuar në de-eskalim të qëndrueshëm të tensioneve dhe riintegrimin e komuniteteve pakicë, të cilat duhet të kenë institucionet e tyre në Kosovë, si dhe në normalizimin ekonomik.

Slomshek theksoi se përparimi në bashkëpunim shihet nga fakti që 1.7 milionë njerëz dhe 650.000 automjete verën kaluar pikat kufitare këtë verë pa probleme, dhe vetëm muajin e kaluar 17.500 kamione. .

Ajo paralajmëroi se investitorët e huaj e shikojnë rrezikun politik dhe se normalizimi është kyç për zhvillimin ekonomik të Kosovës dhe Serbisë, duke nënvizuar mbështetjen e BE-së përmes Planit të rritjes prej 6 miliardë eurosh për rajonin, nga të cilat 880 milionë euro janë për Kosovën.

Gjithashtu, Slomshek theksoi rëndësinë e bashkëpunimit humanitar dhe bëri thirrje për respektimin e obligimeve nga viti 2023 lidhur me personat e zhdukur dhe bashkëpunimin me Kryqin e Kuq, duke kujtuar se 1.600 persona ende figurojnë si të zhdukur.

Ajo nënvizoi se dialogu mes Beogradit dhe Prishtinës është lartë në listën e prioriteteve të Bashkimit Evropian dhe se nuk ka alternativë, ndërsa Brukseli e konsideron dialogun kyç për stabilitetin rajonal dhe integrimin evropian.

"Dialogu nuk është barrë që e vendos Bashkimi Evropian, por një mjet dhe një rrugë për Serbinë dhe Kosovën drejt Bashkimit Evropian. Bashkimi Evropian ju dëshiron në familje", tha Slomshek.