Staroviq: Propozimi i planit nga Osmani për deeskalimin është mjaft i paplotë

Sekretari shtetëror në Ministrinë e Mbrojtjes, Nemanja Staroviq, konsideron se propozimi i planit të shpallur nga kryetari i OSBE-së, Bujar Osmani, për deeskalimin dhe normalizimin e situatës në veri të Kosovës është mjaft i paplotë dhe se i mungon lirimi i serbëve të arrestuar dhe heqje dorë nga arrestimet e mëtejshme, raporton Novosti.

Siç ka shpjeguar ai, kur flitet për procesin e deeskalimit, topi është në fushën e Prishtinës dhe i takon atyre që të tërheqin forcat speciale të policisë.

“Asnjë plan deeskalimi nuk do të çojë në një deeskalmin thelbësor përderisa ne kemi një vullnet të qartë të shprehur në Prishtinë që deeskalimi të ndodhë në çfarëdo mënyre”, tha Staroviq.

Ai shtoi se kur flasim se kur do të rikthehet gjendja e gatishmërisë së ngritur luftarake të ushtrisë serbe, kjo në radhë të parë varet nga vlerësimi i kërcënimeve dhe rreziqeve dhe nga vendimi i komandantit suprem.

“Edhe në skenarin më pozitiv, nëse njësitet speciale të Policisë së Kosovës tërhiqen, nëse kryekomunarët jolegjitimë japin dorëheqje, e gjithë kjo do të thotë pak për ne nëse i ashtuquajturi kryeministër i Kosovës Albin Kurti filloi arrestimin e bashkatdhetarëve tanë nga lista që kishte bërë ditët e kaluara”, ka shpjeguar Staroviq për Tanjug.

Siç tha ai, duhet të ketë një vullnet të mirë për normalizim, por fatkeqësisht administrata e Prishtinës nuk e tregon atë vullnet.

“Ne kemi një precedent diplomatik që është krijuar një konsensus i përgjithshëm që flet në emër të të pesë vendeve anëtare të përhershme të Këshillit të Sigurimit, se fajtori për këtë raund të eskalimit që po shohim në dhjetë ditët e fundit është Albin Kurti, dhe institucionet e përkohshme të vetëqeverisjes në Prishtinë”, tha Staroviq.

Ai shpjegoi se kjo është e mirë, por fatkeqësisht nuk mjafton, pasi një retorikë e tillë duhet të shoqërohet me masa konkrete.

"Po i referohem këtu presionit vendimtar që shtetet e Qunt-it mund të ushtrojnë mbi administratën e Prishtinës për të tërhequr forcat e saj speciale dhe për të liruar serbët e ndaluar. Ky do të ishte një hap thelbësor në drejtim të deeskalimit," vuri në dukje Staroviq.

Ai tha se reagimet e zyrtarëve amerikanë nuk nënkuptojnë se ka pasur një përmbysje të plotë në qasjen e SHBA-së ndaj Prishtinës.

“Për fat të keq, ata gjithmonë do ta mbështesin Prishtinën, por kjo mund të nënkuptojë se ka ndryshime në qëndrimin ndaj Albin Kurtit. Sado problematike ta konsiderojnë amerikanët sjelljen e Kurtit derisa ai është në pushtet në Prishtinë, ata janë të vetëdijshëm se disa gjëra janë më të vështira për t'u zbatuar me të në opozitë. Është e nevojshme që të bëhet një hetim i plotë për ngjarjet në Kosovë dhe Metohi. Sipas gjithçkaje që dimë, serbët po bënin një protestë paqësore, jo të dhunshme, ata nuk ishin të armatosur dhe nuk qëlluan në pjesëtarët e KFOR-it”, shpjegoi Staroviq.

Sipas tij, nëse serbët nga lista e Kurtit arrestohen, mund të ketë një eskalim të ri, më të rrezikshëm.

“Nëse pasoja logjike e leximit të listave janë veprimet e heqjes së lirisë, kam frikë se nuk po shkojmë në drejtim të deeskalimit, por drejt një eskalimi të ri potencial edhe më të rrezikshëm”, ka përfunduar Staroviq.