Kos: Shpresojmë që stabiliteti i rikthyer institucional t'i mundësojë Kosovës të përparojë

Komisionerja evropiane për Zgjerim, Marta Kos, vlerësoi sot, gjatë prezantimit të raportit të Komisionit Evropian për progresin e vendeve kandidate para Komisionit për Politikë të Jashtme të Parlamentit Evropian, se Kosova ka mbetur e përkushtuar ndaj rrugës evropiane, se Serbia ka shënuar regres në fushat që lidhen me vlerat themelore të BE-së, por se qeveria e re ka mundësinë për një fillim të ri.

Kos deklaroi se gjatë periudhës së raportimit, Kosova ka mbetur e përkushtuar ndaj rrugës evropiane dhe se ekziston një nivel i lartë i mbështetjes publike për integrimin evropian. Megjithatë, ngërçi institucional ka ndikuar në zbatimin e reformave që lidhen me BE-në.

“Kosova kohët e fundit ka intensifikuar zbatimin e agjendës së reformave. BE-ja ka përshëndetur zgjedhjen e presidentit të ri dhe shpresojmë që stabiliteti i rikthyer institucional t'i mundësojë Kosovës të përparojë”, tha Kos.

Duke folur për Serbinë, komisionerja evropiane vlerësoi se është shënuar regres në fushat që përbëjnë bazën e integrimit evropian, veçanërisht sa u përket të drejtave themelore, lirisë së shprehjes dhe lirive akademike, si dhe administratës publike.

Njëkohësisht, ajo theksoi se Serbia është ndër vendet kandidate me nivelin më të lartë të përafrimit me acquis-në e BE-së dhe se është e përgatitur mirë për tregun e përbashkët dhe konkurrueshmërinë.

“Qeveria e re e Serbisë ka mundësinë për një fillim të ri. Ajo ka mundësinë të kthejë një faqe të re, të forcojë institucionet demokratike dhe të drejtat themelore, si dhe të ndërmarrë hapat e nevojshëm për përparimin e Serbisë në rrugën drejt anëtarësimit në BE”, deklaroi Kos.

Sa i përket Maqedonisë së Veriut, Kos tha se ky vend ka treguar përkushtim ndaj reformave të BE-së në kuadër të agjendës së reformave, por se tani duhet të tregojë të njëjtën vendosmëri edhe në përparimin në rrugën evropiane.

“Kushtet janë të qarta: Maqedonia e Veriut duhet të përmbushë detyrimin për të zbatuar ndryshimet kushtetuese, siç përcaktohet në konkluzionet e Këshillit të BE-së të 18 korrikut 2022. Komisioni Evropian do të vazhdojë ta mbështesë Maqedoninë e Veriut në rrugën e saj drejt BE-së. Qëllimi ynë mbetet hapja e grupkapitullit të parë sapo të përmbushen kushtet. Tani i takon Maqedonisë së Veriut ta bëjë këtë”, tha Kos.

Ajo shtoi se ndërkohë është shënuar përparim në punën teknike lidhur me kriteret për hapjen e Grupkapitullit 1.

Kos, në fillim të fjalimit të saj, theksoi se raporti për zgjerimin përbën një instrument të rëndësishëm jo vetëm për vendet kandidate, por edhe për shtetet anëtare të BE-së dhe publikun profesional, pasi mundëson një pasqyrë të përparimit të arritur dhe të fushave ku nevojiten reforma shtesë.

Ndër risitë e paketës së sivjetme të zgjerimit, ajo veçoi prezantimin e udhërrëfyesve indikativë për katër vendet që gjatë vitit të kaluar kanë shënuar përparimin më të madh, modelin e ri të integrimit gradual të vendeve kandidate në BE, si dhe fokusin më të madh në ndërlidhjen e sigurisë evropiane me zhvillimin dhe stabilitetin e vendeve në procesin e zgjerimit.

Ajo paralajmëroi se Komisioni Evropian, në tremujorin e parë të vitit të ardhshëm, do të nisë dialogët për integrimin gradual me vendet kandidate, me qëllim shqyrtimin e masave ekzistuese dhe mundësive për përafrim të mëtejshëm me Unionin.

“Zgjerimi është shumë më tepër sesa vlerësimi i reformave, kritereve dhe përparimit. Bëhet fjalë për të ardhmen e Bashkimit Evropian, për atë nëse kemi guximin ta përfundojmë projektin evropian, ta afrojmë kontinentin tonë dhe ta zgjerojmë hapësirën e paqes, demokracisë dhe prosperitetit”, deklaroi Kos.