Surlliq: Interesi kryesor i aktorëve ndërkombëtarë është që Vetëvendosja të mos jetë në pushtet

Interesi kryesor i aktorëve ndërkombëtarë është që Vetëvendosja të mos jetë në pushtet. Aleatët e Prishtinës do të dëshironin që opsionet opozitare të vinin në pushtet, por për momentin ata kanë shumë pak ndikim, thotë për Kosovo online Stefan Surlliq, docent në Fakultetin e Shkencave Politike në Beograd.

“Ata nuk kanë asnjë mekanizëm shantazhi drastik apo presioni, qoftë ndaj Vetëvendosjes, qoftë ndaj partive opozitare,” tha Surlliq për Kosovo online.

Në këtë moment, sipas tij, aktorët ndërkombëtarë kryesisht e shohin Partinë Demokratike të Kosovës si partinë bosht që, në një skenar të mundshëm të përsëritjes së zgjedhjeve, do të ishte ajo që do të udhëhiqte qeverinë e re.

“Gjithashtu janë të vetëdijshëm se Kurti po përqendron gjithnjë e më shumë pushtetin në duart e tij dhe se është shumë i mundshëm skenari që ai të jetë sërish në krye të qeverisë nëse përsëriten zgjedhjet.

Për këtë arsye ata janë shumë të kujdesshëm – komunikojnë, bisedojnë, flasin për opsione të ndryshme, por kurrë nuk do të dëgjoni një qëndrim të qartë se janë kundër qeverisë së Vetëvendosjes apo se e mbështesin me gjithë zemër koalicionin e partive opozitare dhe atyre minoritare,” thekson bashkëbiseduesi ynë.

Është e rëndësishme për aleatët e Kosovës, shton ai, që të ketë një lloj stabiliteti dhe një qeveri me të cilën ata mund të jenë një partner i besueshëm.

"Për ta është e rëndësishme, mbi të gjitha, që dialogu midis Beogradit dhe Prishtinës, i cili është klinikisht i vdekur, të rinovohet përmes qeverisë së re dhe aktorëve të rinj politikë, dhe që Prishtina të jetë ende një palë bashkëpunuese", thotë Surlliq.

Megjithatë, problemi në variantin në të cilin Vetëvendosja do të shkonte në opozitë, siç beson ai, është se do të ishte një opozitë shumë e fortë.

"Asnjë nga aktorët politikë nuk është i gatshëm ta pranojë atë patate të nxehtë që në fillim dhe ta zbusë politikën që është vendosur tashmë, dhe që është diskriminimi sistemik kundër komunitetit serb në veri të Kosovës, si dhe ta rinovojë dialogun me Beogradin ashtu siç duhet. Ata e dinë se kushton shumë politikisht dhe se menjëherë do të paraqiteshin si tradhtarë të interesave kombëtare për hir të një lloj marrëveshjeje me aktorët ndërkombëtarë", thekson ai.

Surlliq beson se partitë do të lobojnë që rezultati i krizës politike të mos jenë zgjedhje të reja dhe që të arrihet një marrëveshje për formimin e institucioneve, por ai thotë se ata e shohin se ka shumë pak shanse për një gjë të tillë sepse edhe aktorët në opozitë po negociojnë individualisht me Vetëvendosjen.

"Në fund të fundit, ata gjithashtu shohin se është imponuar një narrativë që e bën të vështirë çdo ide për normalizimin e marrëdhënieve ose dialogun me Beogradin, kushdo që është në pushtet në Prishtinë", përfundon ai.