Tabela me emrin e Gjingjqit u zhvendos në Mitrovicën e Veriut, ajo e Boletinit mbeti në të njëjtin vend

Tabela me emrin e Zoran Gjingjiq, e cila u instalua dje në Mitrovicën e Veriut pranë tabelës "Isa Boletini", u zhvendos këtë mëngjes nga vendi i saj pranë rrethrrotullimit në hyrje të qytetit.

Që nga mëngjesi i sotëm, tabela me emrin e Zoran Gjingjiq ndodhet pak më poshtë rrugës, e cila të çon nga rrethrrotullimi në rrugën kryesore dhe monumentin e Princit Lazar.

Tabela me emrin e rrugës sipas Isa Boletinit është ende në të njëjtin vend.

Tabela me emra të rinj rrugësh, sipas Boletinit dhe Gjingjiqit, u instaluan dje nga Ministrja e Planifikimit Hapësinor në mandatin teknik, Fitora Pacolli, duke deklaruar se emrat e rinj u zgjodhën në bashkëpunim me administratën e mëparshme në Mitrovicën e Veriut.

Komuna e Mitrovicës së Veriut iu përgjigj këtij veprimi, duke thënë se vendosja e tabelave me emra të rinj rrugësh nuk ishte njoftuar ose koordinuar me përfaqësuesit ligjorë dhe legjitimë komunalë dhe se veprimi u krye për qëllim të fushatës së Lëvizjes Vetëvendosje.

Kryetari i Komunës së Mitrovicës së Veriut, Milan Radojeviq, i mbuloi tabelat me kanavacë, duke deklaruar se vendimi për emërtimin e rrugëve ishte i paligjshëm.

Ndërkohë, Shoqata e Veteranëve të UÇK-së kundërshtoi vendosjen e një tabele me emrin e Zoran Gjingjiq.

Emri i ish-Kryeministrit të Serbisë i shqetësoi gjithashtu qytetarët e Mitrovicës së Jugut, dhe disa prej tyre i thanë Kosova Press se "Isa Boletini dhe Zoran Gjingjiq nuk mund të qëndrojnë në të njëjtin vend".