Vergori: KFOR-i vazhdon të optimizojë gradualisht dislokimin e forcave
Komandanti i KFOR-it, gjeneralmajor Roberto Vergori, deklaroi sot në Tiranë se ky mision i NATO-s në Kosovë po vazhdon të optimizojë dislokimin e forcave të tij, për të siguruar që ato të mbeten të përshtatshme për përmbushjen e detyrave.
Vergori e tha këtë në takimin e 14-të të shefave të shtabeve të përgjithshme të Nismës për Bashkëpunim në Mbrojtje (DECI), duke shtuar se ky proces është gradual dhe varet nga zhvillimi i situatës, si dhe mund të ndryshohet në drejtim të kundërt nëse këtë e kërkojnë zhvillimet që mund të ndikojnë negativisht në sigurinë afatgjatë në Kosovë dhe stabilitetin rajonal.
Në takimin në Tiranë, Vergori informoi vendet anëtare të Nismës për rolin e KFOR-it në avancimin e sigurisë dhe stabilitetit rajonal, si dhe paraqiti një pasqyrë të situatës së sigurisë në Kosovë dhe aktiviteteve të përditshme të misionit.
Ai përsëriti se KFOR-i është plotësisht i përqendruar në zbatimin e mandatit të tij shumëvjeçar të Kombeve të Bashkuara, të bazuar në Rezolutën 1244 të Këshillit të Sigurimit të OKB-së të vitit 1999, duke kontribuar në ruajtjen e një mjedisi të sigurt për të gjithë njerëzit që jetojnë në Kosovë, si dhe në garantimin e lirisë së lëvizjes.
Siç theksoi ai, KFOR-i punon për këtë në mënyrë të paanshme dhe në koordinim të ngushtë me Policinë e Kosovës dhe Misionin EULEX, në kuadër të roleve të tyre përkatëse në reagimin ndaj sfidave të sigurisë.
E themeluar në vitin 2012 nën udhëheqjen e Italisë, Nisma për Bashkëpunim në Mbrojtje përfaqëson një kornizë rajonale për bashkëpunim strategjik dhe ushtarak ndërmjet vendeve të rajonit të Adriatikut dhe Ballkanit Perëndimor.
Ajo ofron një platformë për shqyrtimin e sfidave të përbashkëta të sigurisë, forcimin e bashkëpunimit dhe promovimin e qasjeve të përbashkëta me qëllim mbështetjen e stabilitetit rajonal.
0 komentet