Vuçiç me De Montbrial: Pasojat e vendimeve globale ndihen më drejtpërdrejt nga vendet që duan të ruajnë paqen

Presidenti i Republikës së Serbisë, Aleksandar Vuçiq, u takua me themeluesin dhe presidentin e Konferencës Ndërkombëtare për Politikën Globale, Thierry de Montbrial, me të cilin diskutoi ndryshimet që po kalon bota moderne, luftën në Evropë, krizat në Lindjen e Mesme dhe sfidat e sigurisë dhe ato ekonomike.

"Një bisedë e përzemërt dhe kuptimplotë me Thierry de Montbrial, themeluesin dhe presidentin e Konferencës Ndërkombëtare për Politikën Globale dhe një nga ekspertët më të respektuar evropianë në marrëdhëniet ndërkombëtare, me të cilin kam njohje të gjatë dhe vlerësim të sinqertë. Biseduam për ndryshimet që po kalon bota moderne, luftën në Evropë, krizat në Lindjen e Mesme, sfidat e sigurisë dhe ato ekonomike, si dhe nevojën për të ruajtur hapësirën për dialog dhe politikë të përgjegjshme në një kohë përçarjesh të mëdha", tha Vuçiq në Instagram.

Gjatë takimit, Vuçiç theksoi se është e rëndësishme për vendet e vogla që zëri i tyre të dëgjohet, sepse pasojat e vendimeve të mëdha globale, siç shtoi ai, shpesh ndihen më drejtpërdrejt në vendet që duan të ruajnë paqen, stabilitetin dhe të drejtën për të vendosur për të ardhmen e tyre.

"Mirënjohës për mundësinë për të folur në një platformë kaq të rëndësishme dhe të respektuar rreth pozicionit të Serbisë, rrugës sonë evropiane, politikës së paqes dhe stabilitetit, si dhe rëndësisë së ruajtjes së interesave kombëtare në rrethana komplekse ndërkombëtare. Theksova se Serbia e kupton mirë seriozitetin e momentit në të cilin ndodhet bota", theksoi ai.