Vuçiq me admiralin Wikoff: Theksova rëndësinë e KFOR-it për paqen dhe mbrojtjen e serbëve në Kosovë

Presidenti i Serbisë, Aleksandar Vuçiq, u takua me komandantin e Komandës së Forcave të Përbashkëta të NATO-s në Napoli, admiralin George Wikoff, dhe gjatë takimit theksoi rëndësinë e KFOR-it për paqen dhe mbrojtjen e serbëve në Kosovë, duke këmbëngulur në respektimin e Marrëveshjes së Kumanovës dhe Rezolutës 1244.

“Një takim i rëndësishëm me komandantin e Komandës së Forcave të Përbashkëta të NATO-s në Napoli, admiralin George Wikoff, gjatë të cilit biseduam për forcimin e bashkëpunimit ndërmjet Serbisë dhe NATO-s duke ruajtur neutralitetin ushtarak. Theksova rëndësinë e KFOR-it për paqen dhe mbrojtjen e serbëve në Kosovë dhe Metohi, duke insistuar në respektimin e Marrëveshjes së Kumanovës dhe Rezolutës 1244”, ka deklaruar Vuçiq.

Presidenti i Serbisë theksoi se dialogu i rregullt dhe besimi i ndërsjellë mbeten çelësi për stabilitetin dhe sigurinë rajonale.

“Serbia mbetet e përkushtuar ndaj bashkëpunimit përmes programit Partneriteti për Paqe, duke respektuar interesat e saj kombëtare dhe sovranitetin”, theksoi Vuçiq.