Vuçiq me Rogers: Serbia po bëhet një partner gjithnjë e më i rëndësishëm i SHBA-së në rajon

Presidenti i Serbisë, Aleksandar Vuçiq, u takua sot me nënsekretaren për diplomaci publike të Departamentit Amerikan të Shtetit, Sara Rogers, me të cilën bisedoi për avancimin e mëtejshëm të bashkëpunimit mes Serbisë dhe SHBA-së në të gjitha fushat me interes të përbashkët.

“Na gëzon veçanërisht konfirmimi i pjesëmarrjes së SHBA-së në ekspozitën e specializuar ndërkombëtare Expo 2027 në Beograd, që përfaqëson një njohje të madhe për Serbinë dhe konfirmim të reputacionit që vendi ynë ka ndërtuar në skenën ndërkombëtare”, shkroi Vuçiq në llogarinë e tij në Instagram “Buducnostsrbijeav”.

Expo 2027, siç shtoi ai, do të jetë ngjarja më e madhe ndërkombëtare në historinë moderne të Serbisë dhe një mundësi për t’i prezantuar botës një vend modern, të suksesshëm dhe të hapur, të gatshëm për të zhvilluar më tej partneritetet dhe për të forcuar pozitën e tij ekonomike dhe politike.

“Besoj se Beogradi gjatë Expo 2027 do të dërgojë një imazh të fuqishëm të Serbisë si shtet i stabilitetit, zhvillimit dhe mundësive të reja”, theksoi Vuçiq.

Ai kujtoi se këtë vit shënohen edhe 145 vjet të marrëdhënieve mes Serbisë dhe Shteteve të Bashkuara të Amerikës, gjë që përbën një bazë të rëndësishme për forcimin e mëtejshëm të partneritetit dhe dialogut politik.

“Bashkëpunimi ekonomik mes vendeve tona vazhdon të rritet, me një numër gjithnjë e më të madh kompanish amerikane që investojnë në Serbi, veçanërisht në fushat e infrastrukturës, energjetikës dhe teknologjive të reja. Në të njëjtën kohë po rritet edhe shkëmbimi tregtar, gjë që konfirmon se Serbia po bëhet një partner gjithnjë e më i rëndësishëm i SHBA-së në rajon. Serbia mbetet e hapur për bashkëpunim të mëtejshëm me partnerët amerikanë, veçanërisht në fushën e burimeve të ripërtëritshme të energjisë dhe investimeve të reja, me synimin që të vazhdojmë të ndërtojmë një Serbi moderne, stabile dhe ekonomikisht të fortë”, porositi presidenti serb.