Vujinoviq: Me deklaratat e nënshkruara në Pekin, Serbia po rreshtohet në rendin e ri botëror

Hulumtuesi i studimeve të sigurisë, Nikolla Vujinoviq, thotë se arritjet më të mëdha të vizitës së presidentit të Serbisë, Aleksandar Vuçiq, në Kinë janë dy deklaratat e nënshkruara – e para për Komunitetin me të Ardhme të Përbashkët, që është një iniciativë e re të cilën Kina po e përgatit në mënyrë bilaterale me shtetet e botës dhe ku Serbia është ndër nënshkruesit e parë, duke thelluar kështu partneritetin strategjik mes dy vendeve, dhe e dyta deklarata e përbashkët për mbështetjen e iniciativave globale të Kinës mbi drejtësinë ndërkombëtare, integritetin dhe sigurinë.

Sipas Vujinoviqit, kjo në thelb përfaqëson rreshtimin e Serbisë në një rend të ri botëror.

„Kina, me katër iniciativat e saj globale, dëshiron të lansojë një rend të ri dhe kjo është padyshim rezultat i të gjitha vizitave në Pekin që nga dhjetori – Macron, Starmer, Merz, Trump, Putin, tani presidenti Vuçiq. Është e qartë se Xi Jinping ka një ide se si dëshiron ta ringjallë rendin botëror. Mendoj se kjo është lajmi kryesor pozitiv nga Kina, përveç 23 marrëveshjeve të nënshkruara mbi tema të ndryshme dhe investimeve, ku më pëlqen më shumë shpërndarja e tyre rajonale, sepse jo gjithçka do të jetë në qendra të mëdha, por edhe në qytete më të vogla do të ketë fabrika të teknologjisë së lartë, gjë që është jashtëzakonisht e rëndësishme“, tha Vujinoviq për Kosovo online.

Deklaratat dhe marrëveshjet e nënshkruara gjatë vizitës së presidentit serb në Pekin, shton ai, i sjellin Serbisë sigurinë se të gjitha investimet që ka nga Kina dhe ato që janë nënshkruar tani, me vlerë 953 milionë euro, nuk janë vetëm fjalë në letër.

„Kjo është gjëja kryesore. Kina sigurisht nuk do t’i hedhë kot ato miliarda. Rreth shtatë miliardë euro investime aktuale në Serbi, me këtë pothuajse një miliard shtesë, është me të vërtetë një shumë e konsiderueshme. Nënshkrimi i këtyre marrëveshjeve është mbushja me përmbajtje e frazës ‘miqësi çeliku’. Vazhdimisht dëgjojmë për miqësinë e çelikut dhe do të thoja se pas kësaj vizite pesëditore do ta kuptojmë shumë mirë se çfarë do të thotë ajo. Veçanërisht kur të shohim përmbajtjen e këtyre deklaratave. Jam i bindur se ato janë diplomatikisht të përgjithshme, por tregojnë qartë se Kina është e gatshme të angazhohet më fuqishëm në Evropë përmes Serbisë“, vlerëson Vujinoviq.

Ai shton se vizita e presidentit serb në Kinë nuk është pritur nga Evropa dhe SHBA-të ashtu siç pritej, të paktën sipas reagimeve që shihen, dhe se kjo paraqet një sfidë të madhe për Beogradin.

„Serbia në periudhën e ardhshme do të duhet të komunikojë diplomatikisht me të gjitha ato shtete, për t’u shpjeguar se çfarë do të thotë nënshkrimi ynë i deklaratave dhe marrëveshjeve të ndryshme me Kinën. Por kjo vendos edhe një detyrë të re për Kinën. Nëse vërtet dëshiron të jetë bartëse e rendit të ri botëror ose nxitëse e një ndryshimi të rendit ndërkombëtar, ajo do të duhet të jetë shumë më konkrete në terren sesa është tani. Kina, në të gjitha këto konflikte të mëdha që po zgjasin, nuk po rreshtohet dhe nuk po dënon. Ajo bën thirrje për paqe dhe drejtësi. Po vjen momenti kur do të doja që rajoni i Ballkanit Perëndimor të jetë vendi ku Kina do të tregojë një sjellje më të fuqishme në marrëdhëniet ndërkombëtare dhe të zërë vendin që të gjithë ia parashikojnë si fuqia më e madhe botërore“, tha bashkëbiseduesi ynë.