Young: Do ta inkurajoj Serbinë të promovojë stabilitetin dhe prosperitetin, përfshirë edhe normalizimin e marrëdhënieve me Kosovën

Michael Young, të cilin presidenti i SHBA-së Donald Trump e ka nominuar për ambasador amerikan në Beograd, gjatë seancës dëgjimore para Komisionit për Punë të Jashtme të Senatit amerikan theksoi se, nëse emërimi i tij konfirmohet, do ta inkurajojë Serbinë të promovojë sigurinë, stabilitetin dhe prosperitetin në të gjithë Ballkanin Perëndimor, përfshirë edhe procesin e normalizimit të marrëdhënieve me Kosovën.

Young theksoi se do të udhëheqë ekipin e Ambasadës së SHBA-së në Beograd me qëllim të thellimit të bashkëpunimit në fushën e mbrojtjes dhe sigurisë për avancimin e interesave të SHBA-së, zgjerimit të marrëdhënieve tregtare dhe investuese për rritjen e prosperitetit amerikan, forcimit të stabilitetit rajonal dhe vazhdimit të ndërtimit të partneritetit me Serbinë, i cili do t’i promovojë më mirë interesat amerikane në këtë rajon me rëndësi strategjike.

“Do të vazhdoj të forcoj angazhimin tonë dypalësh dhe të thelloj lidhjet ekonomike dhe të biznesit, duke e orientuar Serbinë drejt pavarësisë energjetike dhe përmirësimit të infrastrukturës energjetike. Do ta inkurajoj Serbinë të përqafojë një të ardhme politike dhe ekonomike që u sjell përfitime Shteteve të Bashkuara, dhe jo konkurrentëve si Rusia dhe Kina. Ekziston një potencial i madh për kompanitë amerikane në Serbi, ndërsa lidhjet më të thella ekonomike me SHBA-në janë në masë të madhe në interesin tonë dhe të Serbisë. Do të punoj për të siguruar një klimë të favorshme biznesi dhe kushte të barabarta afariste, në të cilat ato mund të konkurrojnë dhe të arrijnë sukses”, tha Young.

Ai paralajmëroi se do t’i japë përparësi thellimit të bashkëpunimit me Serbinë në fushën e sigurisë dhe mbrojtjes, duke u mbështetur në lidhjet tashmë të fuqishme që Serbia ka ndërtuar gjatë 20 viteve të fundit me Gardën Kombëtare të Ohajos përmes Programit të Partneritetit Shtetëror, i cili përbën gurthemelin e marrëdhënieve dypalëshe në fushën e sigurisë.

“Do të sigurohem që industria amerikane të jetë në një pozitë të mirë për t’iu përgjigjur interesimit në rritje të Serbisë për përmbushjen e nevojave të saj të mbrojtjes përmes përdorimit të pajisjeve amerikane dhe bashkëpunimit me industrinë amerikane të mbrojtjes”, tha Young.

Nëse merr detyrën e ambasadorit në Beograd, ai tha se do të bashkëpunojë me Qeverinë e Serbisë për përballimin e kërcënimeve globale dhe mbështetjen e prioriteteve dhe interesave të përbashkëta.

“Do ta inkurajoj Serbinë të promovojë sigurinë, stabilitetin dhe prosperitetin në të gjithë Ballkanin Perëndimor, përfshirë edhe procesin e normalizimit të marrëdhënieve me Kosovën”, paralajmëroi Young.

Gjithashtu, siç tha ai, do të vazhdojë të bashkëpunojë me Serbinë që ajo të përdorë ndikimin e saj për ruajtjen e stabilitetit rajonal, përfshirë edhe situatën në Bosnjë e Hercegovinë, në përpjekjet për ruajtjen e paqes së vendosur me Marrëveshjen e Dejtonit.

“Në fund, nëse më jepet ky nder dhe kjo mundësi e madhe për të shërbyer si ambasador i SHBA-së në Republikën e Serbisë, do të punoj me publikun serb për forcimin e partneritetit tonë përmes diplomacisë publike, komunikimeve strategjike dhe lidhjeve ndërmjet njerëzve, në prag të mundësisë së madhe që na ofron ekspozita Expo 2027 në Beograd”, nënvizoi Young.

Ai theksoi se prioriteti i tij kryesor do të jetë siguria e personelit të Ambasadës në Beograd dhe e të gjithë shtetasve amerikanë në Serbi.

Young theksoi se është nder për të që të përfaqësojë SHBA-në në botë.

“Nëse emërimi im konfirmohet, zotohem se do ta justifikoj këtë besim dhe do të bashkëpunoj ngushtë me këtë Komision dhe me Kongresin për mbrojtjen dhe avancimin e interesave të SHBA-së në Serbi, për promovimin e prioriteteve amerikane dhe ndërtimin e marrëdhënieve dypalëshe që kontribuojnë për Shtete të Bashkuara të Amerikës më të sigurta, më të fuqishme dhe më të begata. Shërbimi ndaj kombit tonë të madh dhe popullit amerikan është i rrënjosur thellë në familjen time prej brezash dhe ka përbërë privilegjin dhe nderin më të madh të jetës sonë”, tha Young.

Ai rikujtoi se prindërit e tij kishin shërbyer në ushtri gjatë Luftës së Dytë Botërore.

“Babai im ishte në këmbësori dhe mori pjesë në disa nga betejat më të vështira në Evropë, përfshirë Betejën e Ardeneve. Nëna ime shërbeu në Shërbimin Ajror të Grave, transportonte bombardues dhe trajnonte pilotë”, tha Young, duke theksuar se djali i tij, Stuart, ka shërbyer në gjykatat amerikane dhe si ndihmësprokuror federal për gati dy dekada, ndërsa tani ushtron detyrën e zëvendësprokurorit të përgjithshëm për çështje penale në shtetin federal të Utahut. Vajza e tij, Katherine Owen, dhe dhëndri, Guidon Owen – të dy të diplomuar në Akademinë e Forcave Ajrore të SHBA-së – kanë shërbyer së bashku në vende të ndryshme të botës për më shumë se tri dekada si oficerë të Forcave Ajrore të SHBA-së.

“Edhe unë kam pasur privilegjin të shërbej në të tri degët e pushtetit tonë. Jam vërtet i nderuar dhe ndiej përulësi të thellë që sot po shqyrtohet emërimi im për këtë detyrë të veçantë, e cila mbart përgjegjësi të jashtëzakonshme dhe përbën një detyrë të shenjtë”, tha Young.

Kryesuesi i Komisionit, senatori Jim Risch, duke iu drejtuar Youngut, theksoi se, duke pasur parasysh se Serbia përballet me një sërë sfidash në lidhje me sundimin e ligjit, liritë politike dhe luftimin e ndikimit të dëmshëm të huaj, angazhimi i SHBA-së duhet të përqendrohet në ndihmën ndaj Serbisë për zgjidhjen e këtyre çështjeve, si dhe në tejkalimin e ndarjeve – si brenda vetë vendit, ashtu edhe në marrëdhëniet me fqinjët.

“Rusia dhe Kina gjithashtu kanë pozita të forta në Serbi, veçanërisht në sektorët e energjetikës dhe teknologjisë. Nëse Beogradi dëshiron t’i avancojë marrëdhëniet me SHBA-në, këtë nuk do ta arrijë duke vazhduar bashkëpunimin me kundërshtarët tanë. Pres me interes të dëgjoj planin tuaj se si do ta bindni Serbinë të ecë në drejtimin e duhur, nëse konfirmoheni në detyrën e ambasadorit”, theksoi Risch.

Shtëpia e Bardhë e propozoi Michael Youngun për ambasador të jashtëzakonshëm dhe fuqiplotë të SHBA-së në Serbi në fillim të qershorit të këtij viti.