BE: Puna e Dhomave të Specializuara të Kosovës është e rëndësishme për të siguruar drejtësi për viktimat

Bashkimi Evropian u bën thirrje të gjithë aktorëve, në Kosovë dhe në rajon, për përmbajtje pas aktgjykimit të shkallës së parë të Dhomave të Specializuara të Kosovës ndaj ish-udhëheqësve të UÇK-së, deklaroi sot zëdhënësi i Komisionit Evropian, Christian Wigand, i cili rikujtoi mbështetjen afatgjatë të BE-së për punën e këtij institucioni, me qëllim që të sigurohet drejtësi për viktimat dhe familjet e tyre.

Wigand theksoi se BE-ja ka marrë në dijeni aktgjykimet e shkallës së parë të Dhomave të Specializuara të Kosovës ndaj Hashim Thaçit, Kadri Veselit, Jakup Krasniqit dhe Rexhep Selimit, duke theksuar se vendimet janë marrë në një proces gjyqësor të drejtë dhe të paanshëm, të bazuar në përgjegjësinë penale individuale.

“Personat e dënuar kanë të drejtë ankese në një procedurë të veçantë. BE-ja u bën thirrje të gjitha palëve dhe aktorëve në Kosovë dhe në rajon për përmbajtje. Dhomat e Specializuara dhe Zyra e Prokurorit të Specializuar të Kosovës duhet ta ushtrojnë mandatin e tyre pa ndërhyrje. Drejtësia duhet të ndjekë rrjedhën e saj, gjë që është veçanërisht e rëndësishme për viktimat”, deklaroi Wigand në një konferencë për media në Bruksel.

Autoritetet në Kosovë, siç tha ai, kanë përgjegjësi të garantojnë sigurinë e të gjithë qytetarëve dhe komuniteteve në territorin e Kosovës.

“Më lejoni të rikujtoj mbështetjen afatgjatë të BE-së për Dhomat e Specializuara të Kosovës, një institucion i krijuar në kuadër të sistemit juridik të Kosovës, me vendim të Kuvendit të Kosovës. Puna e tyre është e rëndësishme për të siguruar përgjegjësi dhe drejtësi për viktimat dhe familjet e tyre nga të gjitha komunitetet e Kosovës, gjë që kontribuon në pajtim”, theksoi Wigand.

Ai përsëriti se është me rëndësi thelbësore që Dhomat e Specializuara të Kosovës të mund të punojnë pa frikë dhe frikësim dhe të sigurojnë mbrojtje për viktimat dhe dëshmitarët.

Zëdhënësi i Komisionit Evropian, Guillaume Mercier, rikujtoi qëndrimin e komisioneres evropiane për Zgjerim, Marta Kos, se vendimet e gjykatës duhet të respektohen dhe se bëhet fjalë për aktgjykime të shkallës së parë për përgjegjësi individuale, ndaj të cilave personat e dënuar kanë të drejtë ankese.

Mercier u bëri thirrje aktorëve në rajon se vetëm “përmes pajtimit mund t’i kapërcejnë ndarjet dhe të përqafojnë një të ardhme të përbashkët brenda BE-së”.